"იმედი მაქვს, რომ საგარეო საქმეთა სამინისტროს ექნება სათანადო რეაგირება, როდესაც საქართველოში აკრედიტებული უცხო ქვეყნის წარმომადგენელი ასეთი მტრული თავდასხმებით გამოირჩევა სახელმწიფოსა და მისი უმაღლესი პოლიტიკური თანამდებობის პირების მიმართ," — განაცხადა შალვა პაპუაშვილმა საქართველოში გერმანიის ელჩ პეტერ ფიშერზე საუბრისას.

"მე უკვე არანაირი ხალისი არ მაქვს ამ ადამიანის [პეტერ ფიშერის] მტრულ თავდასხმებზე რაიმე კომენტარის გაკეთებისა. თუ საჭიროდ ჩათვლის საგარეო საქმეთა სამინისტრო შეუძლია დაიბაროს და შესაბამისი გასაუბრება გვქონდეს მასთან.

ჩვენ ვიცით, რომ როცა ის, მისმა სამინისტრომ გაიწვია კონსულტაციებზე ბერლინში, ის დაბრუნდა და დააბრუნეს საქართველოში საქართველოს საგარეო სამინისტროსთან იმ შეთანმხებით, იმ პირობით, რომ ასეთ თავდასხმებს აღარ ექნებოდა ადგილი. ეს პირობა, სამწუხაროდ, დარღვეულია, როგორც ელჩის მხრიდან, ისევე ხედავთ, რომ გერმანიის საგარეო საქმეთა სამინისტროც, ამ მხრივ, ამ პირობას ვერ იცავს.

მე იმედი მაქვს, რომ საგარეო საქმეთა სამინისტროს ექნება სათანადო რეაგირება, როდესაც საქართველოში აკრედიტებული უცხო ქვეყნის წარმომადგენელი ასეთი მტრული თავდასხმებით გამოირჩევა სახელმწიფოს და მისი უმაღლესი პოლიტიკური თანამდებობის პირების მიმართ.

რაც შეეხება ბატონ პეტერს, ვეტყვი კიდეც, რამდენიმე კვირაში ის დატოვებს საქართველოს. ვიცით რომ, აქედან ის პირდაპირ გადის პენსიაში, რაც კარგია იმ მხრივ, რომ ვეღარ დააზიანებს ვერც ერთ სხვა ერს, როგორც ეს, სამწუხაროდ, შეძლო ქართულ-გერმანული ურთიერთობების შემთხვევაში” — განაცხადა შალვა პაპუაშვილმა პეტერ ფიშერის შესახებ.

შეგახსენებთ, რომ მანამდე პეტერ ფიშერმა განაცხადა, რომ "შეწუხებულია ბატონი პაპუაშვილის გამო. მას [პაპუაშვილს] ან ნამდვილად არ ესმის, რას გულისხმობს ევროპა ან თავს აჩვენებს, რომ არ ესმის და არც ერთი მათგანი არის კარგი".