გაერთიანებულმა სამეფომ რუსეთის წინააღმდეგ სანქციების მორიგი, მასშტაბური პაკეტი აამოქმედა. შეზღუდვები 85 ფიზიკურ და იურიდიულ პირს შეეხო, რომლებიც უკრაინელი ბავშვების იძულებით დეპორტაციაში, მათ მილიტარიზაციასა და კრემლის საინფორმაციო ომის კამპანიებში მონაწილეობდნენ.

ბრიტანეთის მთავრობის განცხადებით, ეს არის ერთ-ერთი ყველაზე მკაცრი ნაბიჯი რუსეთის მტრული საქმიანობის წინააღმდეგ, რომელიც რამდენიმე ფრონტს მოიცავს.

ბრიტანული მხარე ამხელს რუსეთის მცდელობებს, გავლენა მოახდინოს სომხეთის მოახლოებულ არჩევნებზე. დოკუმენტების მიხედვით, "სოციალური დიზაინის სააგენტო" (SDA) და ორგანიზაცია ANO Dialog რუსეთის პრეზიდენტის ადმინისტრაციისა და სპეცსამსახურების დავალებით მუშაობდნენ სომხეთში პრორუსული ძალების გაძლიერებასა და ხელისუფლების შეცვლის ხელშეწყობაზე.

სანქცირებულთა სიაში მოხვდნენ პირები და ორგანიზაციები, რომლებიც პასუხისმგებელნი არიან 20 000-ზე მეტი უკრაინელი ბავშვის იძულებით გადასახლებასა და მათ იდეოლოგიურ დამუშავებაზე. მათ შორის არის ე.წ. "მეომართა ცენტრი" (Warrior Centre), სადაც ბავშვებს სამხედრო წვრთნებს უტარებენ და უკრაინული იდენტობის წაშლას ცდილობენ.

"დიდი ბრიტანეთი გულხელდაკრეფილი არ უყურებს, როგორ ცდილობს პუტინი ტყუილებისა და პროკრემლისტური ნარატივების გავრცელებას. ეს სანქციები არის პასუხი რუსეთის მცდელობებზე, დააზიანოს დემოკრატია და გაანადგუროს უკრაინის მომავალი ბავშვების ამაზრზენი დეპორტაციით", — განაცხადა საგარეო მდივანმა, ივეტ კუპერმა.

სანქციების პარალელურად, დიდი ბრიტანეთი დამატებით 1.2 მილიონ ფუნტ სტერლინგს გამოყოფს უკრაინელი ბავშვების მოძიებისა და იდენტიფიცირების პროგრამებისთვის. ეს თანხა მოხმარდება სპეციალურ ვერიფიკაციის ცენტრებს, რომლებიც გაეროს საგამოძიებო კომისიას რუსეთის ქმედებების, როგორც კაცობრიობის წინაშე ჩადენილი დანაშაულის, დამტკიცებაში ეხმარებიან.

დღეის მდგომარეობით, გაერთიანებულ სამეფოს რუსეთის წინააღმდეგ ჯამში 3 300-ზე მეტი სანქცია აქვს დაწესებული.