"სამართლიანი არჩევნებისა და დემოკრატიის საერთაშორისო საზოგადოებამ" (ISFED) საქართველოს პოლიტიკური პარტიების 2025 წლის ფინანსური ანგარიშების ანალიზი გამოაქვეყნა. ამის შესახებ ინფორმაციას ორგანიზაცია სოციალურ ქსელში ავრცელებს.

ორგანიზაციის ცნობით, 2025 წლის წლიური შემოსავლებისა და ხარჯების შესახებ ინფორმაცია ანტიკორუფციულ ბიუროში 44-მა პოლიტიკურმა პარტიამ წარადგინა, თუმცა ფინანსური ბრუნვა მხოლოდ 25 პარტიას ჰქონდა.

"2025 წლის წლიური შემოსავლებისა და ხარჯების შესახებ ინფორმაცია ანტიკორუფციულ ბიუროში 44-მა პოლიტიკურმა პარტიამ წარადგინა, თუმცა მათ შორის ფინანსური ბრუნვა მხოლოდ 25 პარტიას გააჩნდა. 21 პოლიტიკურ გაერთიანებას გასული წლის განმავლობაში საერთოდ არ ჰქონია შემოსავალი, ხოლო 19-ს — ხარჯი.

"სამართლიანი არჩევნები" გთავაზობთ 2025 წელს საქართველოს პოლიტიკური პარტიების ფინანსების ანალიზს.

პოლიტიკური პარტიების ჯამურმა შემოსავალმა დაახლოებით 49 მლნ ლარი შეადგინა, საიდანაც ქართულმა ოცნებამ უფრო მეტი შემოსავალი (26.5 მლნ ლარი) მიიღო, ვიდრე ყველა სხვა პოლიტიკურმა პარტიამ ერთად (22.5 მლნ ლარი).


სახელმწიფო ბიუჯეტიდან ექვსი პოლიტიკური პარტიის დასაფინანსებლად გასული წლის განმავლობაში სულ 8.9 მლნ ლარი გაიცა, რომლის 68% ქართულ ოცნებას ერგო. ამასთან, წლის ბოლოსათვის კიდევ უფრო შემცირდა სახელმწიფო დაფინანსების მიმღები პარტიების რიცხვი.

შემოწირულებები 21-მა პოლიტიკურმა პარტიამ მიიღო. შემოწირულებების ჯამური ოდენობა 27 მლნ ლარს აღემატებოდა, ხოლო მისი 67% ერთ პარტიაზე, ქართულ ოცნებაზე, მოდიოდა.

პოლიტიკური პარტიების ჯამურმა ხარჯმა 2025 წელს 46 მლნ ლარზე მეტი შეადგინა. მათ შორის, 23.8 მლნ ლარი (52%) ქართულმა ოცნებამ დახარჯა.

პარტიების საერთო ხარჯების უმეტესი ნაწილი რეკლამის (13.9 მლნ ლარი), შრომის ანაზღაურების (5.4 მლნ ლარი), იჯარისა (4.3 მლნ ლარი) და კაპიტალურ (9.4 მლნ ლარი) ხარჯებზე მოდიოდა," — აღნიშნულია ორგანიზაციის მიერ გავრცელებულ ინფორმაციაში.

უფრო ვრცლად შეგიძლიათ იხილოთ აქ.