ირანმა აშშ-ის ბოლო წინადადებაზე პასუხი პაკისტანის შუამავლებს ოფიციალურად გადასცა — ინფორმაციას ირანის ოფიციალური საინფორმაციო სააგენტო IRNA ავრცელებს.

მათი ცნობით, თეირანმა პაკისტანელ შუამავლებს ოფიციალურად წარუდგინა პასუხი ვაშინგტონის ბოლო შეთავაზებაზე, რომელიც რეგიონში სამხედრო მოქმედებების დასრულებას ეხება. წყაროს განცხადებით, მოლაპარაკებების მიმდინარე ეტაპი მხოლოდ საომარი მოქმედებების შეწყვეტაზეა ორიენტირებული.

IRNA-ს ინფორმაციით, ირანის პასუხი რამდენიმე ძირითად მოთხოვნას მოიცავს — ცეცხლის დაუყოვნებლივ შეწყვეტას, ირანის პორტების საზღვაო ბლოკადის მოხსნას, ჰორმუზის სრუტეში უსაფრთხო ნაოსნობის აღდგენასა და ირანის წინააღმდეგ ახალი სამხედრო თავდასხმებზე უარის გარანტიებს.

მანამდე ირანის საგარეო საქმეთა სამინისტროს წარმომადგენელმა განაცხადა, რომ თეირანი აშშ-ის წინადადებებთან დაკავშირებით საკუთარ მოსაზრებებსა და შენიშვნებს შიდა განხილვების დასრულების შემდეგ გადასცემდა.

ამასთან, სააგენტოს გავრცელებული ინფორმაციით, პაკისტანის შუამავლობით 8 აპრილს თეირანსა და ვაშინგტონს შორის ცეცხლის შეწყვეტის შეთანხმება შედგა, რომელმაც ირანის წინააღმდეგ აშშ-ისა და ისრაელის თითქმის 40-დღიანი სამხედრო ოპერაცია შეაჩერა. მოგვიანებით ისლამაბადში გამართული მოლაპარაკებები შეთანხმების გარეშე დასრულდა.

დონალდ ტრამპი ირანის პასუხს სოციალურ ქსელ Truth Social-ზე გამოეხმაურა.

"ახლახან წავიკითხე ირანის ე.წ. „წარმომადგენლების“ პასუხი. არ მომწონს — სრულიად მიუღებელია! მადლობა ყურადღებისთვის", — დაწერა ტრამპმა.

საერთაშორისო მედიის ცნობით, ვაშინგტონისთვის მიუღებელი სწორედ ის აღმოჩნდა, რომ თეირანმა საკუთარ პასუხში ბირთვული პროგრამისა და ურანის გამდიდრების საკითხი არ განიხილა და მისი განხილვა მომდევნო ეტაპისთვის გადადო, მაშინ როცა აშშ მიიჩნევს, რომ ეს საკითხი ნებისმიერი საბოლოო შეთანხმების ერთ-ერთი მთავარი პირობა უნდა იყოს.

შეგახსენებთ, ტრამპმა ჰორმუზის სრუტის გახსნის ვადები რამდენჯერმე გაახანგრძლივა. 21 მარტს ტრამპი ირანს ელექტროსადგურების განადგურებით პირველად დაემუქრა, თუ სრუტე 48 საათში "სრულად არ გაიხსნებოდა". ორი დღის შემდეგ მან თქვა, რომ დარტყმებს კიდევ ხუთი დღით — 28 მარტამდე გადადებდა, სანამ ირანთან "კარგი" და "პროდუქტიული" მოლაპარაკებები გრძელდებოდა. ირანმა ოფიციალურ პირებსა და ტრამპის ადმინისტრაციას შორის რაიმე სახის კონტაქტი უარყო. აღნიშნული თარიღის მოახლოებისას ტრამპმა ბოლო ვადა კიდევ 10 დღით, 6 აპრილამდე გადასწია.

6 აპრილს ირანმა აშშ-ის 10-პუნქტიანი სამშვიდობო გეგმა შესთავაზა. ამის შესახებ ინფორმაცია ირანის სახელმწიფო მედიაზე დაყრდნობით The New York Times-მაგაავრცელა. გეგმა პაკისტანის მეშვეობით გადაიცა, რომელიც კონფლიქტში მთავარი შუამავლის როლს ასრულებს.

ორშაბათს, 6 აპრილს თეთრ სახლში გამართულ პრესკონფერენციაზე ტრამპმა კიდევ ერთხელ გაიმეორა მუქარა, რომ თუ მისი პირობები7 აპრილს, აღმოსავლეთის დროით საღამოს 8 საათამდე არ შესრულდება, ის ირანის მასშტაბით დამანგრეველი საჰაერო დარტყმების შესახებ ბრძანებას გასცემდა.

ცნობისთვის, 8 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა.

თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი. მედიაში გავრცელებული ცნობებით, ირანის ახალ სულიერ ლიდერად ალი ხამენეის ვაჟი მოჯტაბა აირჩიეს. "ადამიანის უფლებათა დამცველების საინფორმაციო სააგენტოს" (HRANA) მონაცემებით, 2026 წლის დასაწყისისთვის ირანში მიმდინარე საპროტესტო აქციების დროს დაღუპულთა რაოდენობა მკვეთრად გაიზარდა და მსხვერპლთა რიცხვმა 6 000-ს გადააჭარბა.