შვედურმა უფლებადაცვითმა ორგანიზაციამ Civil Rights Defender-მა გამოცემა ნეტგაზეთს 2026 წლის უფლებადამცველის ჯილდო გადასცა, — ინფორმაციას Civil Rights Defender ავრცელებს.

ნეტგაზეთთან ერთად წლის უფლებადამცველის ჯილდო კუბურ გამოცემას La Hora de Cuba-საც გადაეცა.

"ორი მედიაპლატფორმა, რომელიც დუმილზე უარს ამბობს", – ასე მოიხსენიებს Civil Rights Defender წლის უფლებადამცველ მედიებს.

"ზოგიერთ რედაქციაში სამუშაო დღე ელექტრონული ფოსტის შემოწმებით იწყება, სხვებში კი — რისკების განსაზღვრით. ეს არის ყოველდღიური რეალობა საქართველოში მოქმედი დამოუკიდებელი მედიაპლატფორმისთვის, ნეტგაზეთისთვის და კუბური La Hora de Cuba-სთვის, რომლებსაც წელს "წლის უფლებადამცველის ჯილდო 2026" გადაეცათ. მათთვის დამოუკიდებელი ჟურნალისტიკა ნიშნავს ყოველდღიურ რისკს იმ გარემოში, სადაც ხელისუფლება კრიტიკას მუქარით, დევნითა და პატიმრობით პასუხობს. მიუხედავად ამისა, ისინი აგრძელებენ მუშაობას ყოველდღე." — ნათქვამია ორგანიზაცია Civil Rights Defenders-ის საბჭოს მიერ მომზადებულ შეფასებაში.

Civil Rights Defenders-ის განცხადებით, წელს ჯილდო ორ გამარჯვებულს გადაეცა, რათა ხაზი გაესვას გლობალურ ტენდენციას — "განსხვავებული პოლიტიკური სისტემების პირობებშიც კი, დამოუკიდებელ მედიაზე ხორციელდება ზეწოლა, მათი დისკრედიტაცია და დასჯა“.