საქართველოს ახალგაზრდა იურისტთა ასოციაცია საქართველოში ბავშვებზე სექსუალური ძალადობის წინააღმდეგ სახელმწიფოს რეაგირების გამოწვევების მიმოხილვას ავრცელებს.

მათი განცხადებით, საქართველოში ბავშვებზე წლების განმავლობაში გადაუჭრელი რჩება ბავშვებზე სექსუალური ძალადობის პრევენციის, მსხვერპლთა მხარდაჭერის, დანაშაულების სათანადოდ გამოვლენის, გამოძიების პრობლემები და კოორდინირებული პოლიტიკის გამოწვევები.

"საიას შეფასებაში გაანალიზებულია საქართველოში ბავშვებზე სექსუალური ძალადობის წინააღმდეგ ბრძოლის კუთხით არსებული მდგომარეობა და გამოწვევები საერთაშორისო-სამართლებრივი ჩარჩოს, მათ შორის, ლანზაროტის კონვენციის 4 პრინციპის მიხედვით. ეს გულისხმობს: პრევენციას, დაცვას, დამნაშავეთა დასჯასა და თანამშრომლობას ეროვნულ და საერთაშორისო დონეზე.

სამწუხაროდ, ბავშვების მიმართ სექსუალური ძალადობის წინააღმდეგ ბრძოლა საქართველოში, წლების განმავლობაში გარკვეული პოზიტიური ნაბიჯების მიუხედავად, კვლავ მრავალი გამოწვევით და სისტემური პრობლემით ხასიათდება, რაც ასახულია როგორც ეროვნულ, ისე საერთაშორისო ანგარიშებსა და შეფასებებში.

წლების განმავლობაში გადაუჭრელი რჩება ბავშვებზე სექსუალური ძალადობის პრევენციის, მსხვერპლთა მხარდაჭერის, დანაშაულების სათანადოდ გამოვლენის, ეფექტიანი გამოძიების პრობლემები და კოორდინირებული პოლიტიკის გამოწვევები." — ნათქვამია საიას მიერ გავრცელებულ მიმოხილვაში.