იტალიის საგარეო საქმეთა მინისტრმა, ანტონიო ტაიანიმ რუსეთის ელჩი ოფიციალურად დაიბარა მას შემდეგ, რაც რუსმა ტელეწამყვანმა, ვლადიმერ სოლოვიოვმა, იტალიის პრემიერმინისტრი, ჯორჯა მელონი პირდაპირ ეთერში შეურაცხმყოფელი სიტყვებით მოიხსენია.

ვლადიმირ სოლოვიოვმა პირდაპირ ეთერში იტალიურად თქვა, რომ მელონი "მეძავი", "კაცობრიობის სირცხვილი", "ველური მხეცი", "ნამდვილი იდიოტი" და "საცოდავი პატარა ქალია".

"ეს მელონი ფაშისტური არსებაა, რომელმაც უღალატა თავის ამომრჩევლებს. მან ტრამპსაც კი უღალატა," — განაცხადა დამატებით სოლოვიოვმა რუსულად.

ტაიანის განცხადებით, იტალიის საგარეო საქმეთა სამინისტროში დაიბარეს რუსეთის ელჩი ალექსეი პარამონოვი, რათა ოფიციალურად გაეპროტესტებინათ სოლოვიოვის "უკიდურესად სერიოზული და შეურაცხმყოფელი განცხადებები". ამის შესახებ ინფორმაცია მან X-ზე გაავრცელა.

ინციდენტს მკაცრი შეფასება მოჰყვა იტალიაში — სოლოვიოვის განცხადებები ქვეყნის ოპოზიციურმა პარტიებმაც დაგმეს.