ეშმაკს აცვია პრადას მეორე ნაწილიდან სიდნი სვინის ეპიზოდური როლი ამოჭრეს. ინფორმაციას გამოცემა Entertainment Weekly ავრცელებს.

როგორც ცნობილია, სვინის ეპიზოდური როლი ფილმის დასაწყისშივე უნდა ყოფილიყო. თუმცა, გარკვეული გადაწყვეტილებების მიღების შემდეგ ცნობილი გახდა, რომ Euphoria-ს ვარსკვლავის სცენები უნდა ამოეჭრათ.

ფოტო: Getty Images

Entertainment Weekly-ის ცნობით, სვინი ფილმში საკუთარი თავის როლს ირგებდა და ემილი ბლანტის პერსონაჟის, ემილი ჩარლტონის, კლიენტი იყო. წყარომ დაადასტურა, რომ სვინი ფილმში არ გამოჩენილა.

აღსანიშნავია, რომ ეშმაკს აცვია პრადას მეორე ნაწილში სიდნის როლის შესახებ ინფორმაცია ჯერ კიდევ გასული წლის აგვისტოდან გვქონდა, როცა მსახიობი გადასაღებ მოედანზე ემილი ბლანტთან ერთად დააფიქსირეს.

ეშმაკს აცვია პრადა 2-ის სცენარის ავტორმა, ალინ ბროშ მაკენამ, დაადასტურა, რომ ფილმში არ იქნება სიდნის სცენები. მაკენას თქმით, გადასაღები მოედნიდან ხშირად ვრცელდებოდა ფოტოები და ხალხს ეგონა, ნებისმიერი ადამიანი, რომელიც იქვე იყო, ფილმში მიიღებდა მონაწილეობას.

კითხვაზე, თუ რატომ აღარ არის ფილმში სვინი, სცენარის ავტორმა უპასუხა: "თქვენ ხომ უყურეთ ფილმს? ის [სიდნი სვინი] არ მონაწილეობს".

ფოტო: 20th Century Studios

შეგახსენებთ, რომ 2006 წელს გამოსული ფილმის მეორე ნაწილს ორიგინალი სამსახიობო შემადგენლობის მონაწილეობით დისნეი იღებს. მოდის ჟურნალის მთავარი რედაქტორის, მირანდა პრისლის, როლს მერილ სტრიპი შეასრულებს. მისი ასისტენტების, ანდრეასა და ემილის, როლებში კი კვლავ ენ ჰეთეუეისა და ემილი ბლანტს ვიხილავთ.

პაპარაცული ფოტო "ეშმაკს აცვია პრადა 2"-ის გადაღებებიდან — ენ ჰეთეუეი და მერილ სტრიპი

პაპარაცული ფოტო "ეშმაკს აცვია პრადა 2"-ის გადაღებებიდან — ენ ჰეთეუეი და მერილ სტრიპი

ფოტო: MEGA/GC Images

მეორე ნაწილში მთავარი პერსონაჟების როლების შემსრულებლების გარდა, სტენლი ტუჩის, პატრიკ ბრემალს, ლუსი ლიუს, ლედი გაგას, პოლინ შალამესა და სიმონ აშლის ვიხილავთ. ახალ ფილმში არ დაბრუნდება ადრიან გრენიე, რომელიც პირველ ნაწილში ანდრეას შეყვარებულის როლს თამაშობდა.

ეშმაკს აცვია პრადა 2-ის პრემიერის თარიღი 2026 წლის 1-ელი მაისია.