განათლების მინისტრის მოადგილის, ზვიად გაბისონიას განცხადებით, სკოლის ფორმები არ იქნება ძვირადღირებული და მშობლისთვის 30-50%-ით უფრო იაფი იქნება, ვიდრე მშობელს შვილის სასკოლო აღჭურვა უჯდება.

"ვერ დაგეთანხმებით "ძვირადღირებულობასთან" დაკავშირებით. ამის მოკვლევა ჩატარებული გვაქვს, რა თქმა უნდა. სასკოლო ფორმები დაახლოებით იქნება 30-დან 50 პროცენტამდე უფრო იაფი, ვიდრე მშობელს დღეს უხდება მისი სასკოლო აღჭურვა. სოციალურად დაუცველ პირებზე მინისტრმა განაცხადა, რომ 60 000 ქულაზე ნაკლებ მოსწავლეებზე სახელმწიფომ მიიღო გადაწყვეტილება და თვითონ უზრუნველყოფს აღნიშნული ტიპის დაფინანსებას. არის მშობელთა დიდი ნაწილი, რომელთაც აბსოლუტურად პოზიტიური დამოკიდებულება აქვთ. რა თქმა უნდა, გამონაკლისები არსებობს," — განაცხადა განათლების მინისტრის მოადგილემ, ზვიად გაბისონიამ. (წყარო IPN)

გაბისონიამ ასევე დასძინა, რომ სკოლის ფორმის ღირებულება "ერთ ასეულ ლართან დაახლოებული რიცხვი იქნება".

შეგახსენებთ, ზოგადი განათლების შესახებ კანონში შეტანილი ცვლილებების მიხედვით, 2026 წლის სასწავლო წლიდან I-VI კლასებში სასკოლო ფორმა სავალდებულო გახდება. მიქანაძის განმარტებით, სოციალურად დაუცვლი ოჯახები სასკოლო ფორმაზე სახელმწიფოსგან "მხარდაჭერას მიიღებენ".