პარტია გახარია — საქართველოსთვის წევრმა, გიორგი შარაშიძემ, უნგრეთში პეტერ მადიარის წარმატებასა და გიორგი გახარიას პოლიტიკურ გზას შორის სხვაობებზე "პალიტრანიუსთან" ისაუბრა.

წამყვანის კითხვაზე, თუ რატომ ვერ შეძლო გახარიამ, რომელმაც მადიარის მსგავსად მმართველი გუნდი და პრემიერის პოსტი პროტესტით დატოვა, იდენტური შედეგის დადება, დეპუტატმა უპასუხა, რომ "ჯერ ყველაფერი წინ არის".

"თქვენ კარგად იცით, რატომაც ვერ [დადო ისეთი შედეგი, როგორც მადიარმა]. ჯერ ერთი ყველაფერი წინ არის. სულ სხვა სიტუაცია გვაქვს ჩვენ. როდესაც უნგრეთს ვადარებთ, რამდენიმე განმასხვავებელი ფაქტორია — დიდწილად ჰგავს ვითარება, მაგრამ ევროკავშირის წევრია[უნგრეთი]. რუსეთის პირდაპირი გეოგრაფიული მეზობელი არ არის. ომი არ ჰქონია რუსეთთან. არ ჰყავს ოპოზიციური ნაწილი, რასაც ნაციონალური მოძრაობის ფრთა წარმოადგენს — საფრთხობელას სახით არ ჰყავს", — განაცხადა შარაშიძემ.

გიორგი გახარიაზე საუბრისას შარაშიძემ აღნიშნა, რომ არც ქართულ ოცნებას და არც ნაციონალურ მოძრაობას მათი გაძლიერება "არ აწყობდათ".

"ჩვენ ორ ცეცხლშუა ვიყავით, ერთი ოცნების მხრიდან, მეორე ნაცების მხრიდან, რადგან არცერთს არ აწყობდა გახარიას გაძლიერება", — თქვა მან.

შარაშიძემ დასძინა, რომ მიუხედავად იმისა, რომ "გახარია არის პოლიტიკური დევნილი", პარტია აგრძელებს განვითარებას და სამომავლო შედეგები ჯერ კიდევ წინ არის.

"დაგველოდეთ, "გვაცალეთ ბატონო, გვაცალეთ", ხომ იცით ქართული ფილმი", — განაცხადა შარაშიძემ.