აშშ-ის პრეზიდენტმა დონალდ ტრამპმა სოციალურ ქსელში გამოქვეყნებული ხელოვნური ინტელექტის მიერ გენერირებული ფოტო წაშალა, სადაც ის იესოს სახით იყო წარმოდგენილი.

ფოტომ სოციალურ მედიაში კრიტიკა გამოიწვია, მათ შორის ტრამპის რელიგიური მხარდამჭერების მხრიდანაც.

მოგვიანებით ტრამპმა ფოტო წაშალა. ჟურნალისტებთან საუბარში მან უარყო, რომ საკუთარ თავს იესოს ადარებდა და განაცხადა, რომ გამოსახულებაში თავი "ექიმად" წარმოედგინა.

"მე ეს დავპოსტე და ვფიქრობდი, რომ ეს მე ვიყავი, როგორც ექიმი, წითელი ჯვრის კონტექსტში. ეს უნდა ყოფილიყო ექიმი, რომელიც ადამიანებს უკეთესს ხდის. და მე ვაკეთებ ამას — ადამიანებს ბევრად უკეთესად ვაქცევ,” — განაცხადა მან.

ცნობისთვის, ეს პირველი შემთხვევა არ არის, როდესაც ტრამპი რელიგიურ სიმბოლიკას იყენებს. 2023 წელს, ბანკის თაღლითობის საქმის სასამართლო პროცესის დროს, მან გააზიარა ილუსტრაცია, სადაც ის იესოს გვერდით ზის სასამართლოში.

ტრამპი განსაკუთრებით ძლიერი მხარდაჭერით სარგებლობს ევანგელისტ ქრისტიანებს შორის და ხშირად ხვდება რელიგიურ მრჩევლებს. ერთ-ერთმა მათგანმა, ტელეევანგელისტმა პაულა უაითმა, თეთრ სახლში გამართულ სააღდგომო შეხვედრაზე ტრამპი იესოს ისტორიასაც შეადარა.

"თქვენ გიღალატეს, დაგაკავეს და ცრუ ბრალდება წაგიყენეს. ეს ნაცნობი ისტორიაა, რომელიც ჩვენმა მხსნელმა ღმერთმა გვაჩვენა", — აღნიშნა მან.

ამასთან, ტრამპს დაძაბული ურთიერთობა აქვს კათოლიკურ ეკლესიასთან. მან გააკრიტიკა პაპი ლეო XIV, რომელიც ირანის ომის საკითხზე მის პოლიტიკას ეწინააღმდეგება.

"ბოდიშის მოსახდელი არაფერია. ის ცდება,“ — განაცხადა ტრამპმა. "პაპმა ლეომ თქვა ისეთი რამ, რაც არასწორია. ის კატეგორიულად ეწინააღმდეგებოდა იმას, რასაც მე ვაკეთებ ირანთან დაკავშირებით და არ შეიძლება გქონდეს ბირთვული ირანი", — აღნიშნა ტრამპმა. ამასთან მან დასძინა, რომ ლეო "ძალიან სუსტი იყო დანაშაულთან და სხვა საკითხებთან დაკავშირებით".