თბილისში ტრამვაის ხაზის პროექტირებისა და მშენებლობისთვის გამოცხადებული ტენდერი დასრულდა. ამ ეტაპზე გადაწყვეტილი არ არის, თუ რომელი კომპანიის პროექტით განხორციელდება სამუშაოები. ამის შესახებ ინფორმაციას თბილისის მერია ავრცელებს.

დედაქალაქის მერის, კახა კალაძის განცხადებით, სატენდერო წინადადებები ოთხმა უცხოურმა კომპანიამ წარადგინა და ამ ეტაპზე მიმდინარეობს დოკუმენტაციის დეტალური ანალიზი.

"დაგეგმილი გვაქვს დიდი დიღმის დასახლების მეტროსადგურ "დიდუბესთან“ დამაკავშირებელი ტრამვაის ხაზის პროექტის განხორციელება, რაც ჩვენი დედაქალაქის სატრანსპორტო სისტემის და კომფორტული გადაადგილებისთვის ძალიან მნიშვნელოვანია. სამწუხაროდ, წინა ხელისუფლების პირობებში, ტრამვაის ხაზების დემონტაჟი მოხდა. გამოცხადებული გვქონდა ტენდერი, რომელიც გუშინ დასრულდა. მოცემულ ტენდერში მონაწილეობის სურვილი გამოთქვა და შესაბამისი სატენდერო წინადადებები წარმოადგინა ოთხმა კომპანიამ და ერთობლივმა საწარმომ, მათ შორის სამი თურქეთში, ხოლო ერთი ჩინეთში არის რეგისტრირებული. ოთხივე პრეტენდენტი წარმოადგენს საკმაოდ მსხვილ და გამოცდილ კომპანიებს, რომელთაც არაერთი ანალოგიური პროექტი აქვთ განხორციელებული. უკვე დაწყებულია წარმოდგენილი დოკუმენტაციის დეტალური ანალიზი და გამოცხადებული ტენდერის პირობებთან შესაბამისობის დადგენის პროცესი, რასაც გარკვეული დრო დასჭირდება, რის შემდეგაც გამოვლინდება გამარჯვებული კომპანია და მასთან დაიდება შესაბამისი ხელშეკრულება", — განაცხადა თბილისის მერმა.

რაც შეეხება ტრამვაის ხაზის ტრაექტორიას, პროექტი დაიწყება დიდი დიღმის მე-3 და მე-4 მიკრორაიონების მიმდებარე ტერიტორიიდან და შეუერთდება მეტროსადგურ "დიდუბის" მიმდებარე ტერიტორიას. პროექტის მიხედვით, ხაზის სიგრძე დაახლოებით 7.5 კილომეტრი იქნება და მასზე 11 გაჩერება განთავსდება.

როგორც კალაძე განმარტავს, ტრამვაის ხაზის პროექტი მიზნად ისახავს დიდი დიღმის მოსახლეობისთვის საზოგადოებრივ ტრანსპორტზე წვდომის გაუმჯობესებას და გადაადგილების დროის შემცირებას.

"პროექტის დასრულების შემდეგ მოხდება ტრამვაის ხაზის ერთიან სატრანსპორტო ქსელში ინტეგრირება, რაც მნიშვნელოვნად გააუმჯობესებს დიდი დიღმის მოსახლეობის საზოგადოებრივ ტრანსპორტთან ხელმისაწვდომობას და შეამცირებს ტრანსპორტირების დროს", — აღნიშნა თბილისის მერმა.