10+ ტიპის ადამიანი, რომელიც საზოგადოებრივ ტრანსპორტში ყველას გვირყევს აურას

საზოგადოებრივი ტრანსპორტით მგზავრობა ბევრ ჩვენგანს ყოველდღიურად, ზოგს კი დღეში რამდენჯერმეც კი უწევს. და როცა ქალაქის სატრანსპორტო პოლიტიკა ისედაც ეგზისტენციალურ კრიზისში გვყრის, კარგი იქნებოდა, მგზავრები მაინც ვთანხმდებოდეთ რამდენიმე ელემენტარულ, დაუწერელ წესზე, რომ მეტროთი ან ავტობუსით გადაადგილების ხშირად არცთუ სასიამოვნო გამოცდილება სულ მთლად აუტანელ წუთებად არ ვაქციოთ. ცხადია, ამ წესების უმრავლესობა არ ისწავლება, მაგრამ რაღაც შინაგანი ხმა უნდა გკარნახობდეს, რომ ასე არ მოიქცე და არ გახდე ის ნერვებისმომშლელი ადამიანი...

1. გადატენილ ავტობუსსა და ვაგონში ზურგჩანთას რომ არ იხსნის

კი, ძალიან შევწუხდით. უბრალოდ, იმხელა ჩანთა გაქვს, ან ხმას ვერ გაწვდენთ, ან კედელზე მიგვასრისე უკვე.

2. კარში რომ იჭედება და არ ჩადის

რა თქმა უნდა, არ გკითხეთ, ჩადიხარ თუ არა, რადგან არცთუ სავსე ვაგონში/ავტობუსში ისე ახლოს დადექი კართან, თითქოს მარათონისთვის ემზადებოდი. იქნებ უკან მოგეხედა?

3. ბოლო წამს რომ ახსენდება ჩასვლა

...და ისე გადაგთელავს, თითქოს აქეთ გაქვს მოსაბოდიშებელი, გზაზე რომ ეღობები.

4. ხალხს ჩამოსვლას რომ არ აცდის

ცარიელი სკამისთვის ბრძოლა ზოგჯერ ძალიან დრამატული ხდება ხოლმე.

5. მეტროში ესკალატორის მარცხენა მხარეს რომ დგება

კი, შენ წარმოიდგინე და, ზოგს ისე გვეჩქარება, რომ პირდაპირ მეტროში გვიწევს "კარდიოს" გაკეთება.

6. მეტროს შესასვლელ-გასასვლელს რომ ვერ არჩევს

რამხელაზე შეიძლება ნიშნები ეხატოს კარს, რომ დაინახო?

7. ავტობუსის შუა ნაწილში რომ ცარიელი სივრცეა, მაგრამ ჯიუტად არ იძვრის ადგილიდან

ჩაგატარებთ, შენი გაჩერება რომ მოვა, მაგრამ იქნებ მანამდე ამოსვლის საშუალება მოგვცე?

8. ავტობუსში ფეხის ამოდგმიდან ჩასვლამდე რომ პირს არ აჩერებს და ტელეფონზე ქაქანებს

ან ამ ტიპის სხვა ვარიანტი: მუსიკა/ვიდეო რომ ყურსასმენების გარეშე აქვს ტელეფონში ჩართული. სხვა თუ არაფერი, უხერხული საუბრების მოსმენას ისევ ვიღაცის ტიკტოკის "ფორ იუ" გვერდის გაცნობა სჯობს.

9. სხვების გარეგნობას რომ განიკითხავს

ნწ, ნწ, რა თაობა მოდის...

10. სკამზე ფეხებს რომ ნიკოფსიიდან დარუბანდამდე შლის

პერსონალურად დამზადებული სავარძელიც დაგიდგათ, ხომ არ გინდა?

11. ვირუსიანი რომ უპირბადოდ დაიარება

სულ მცირე, იდაყვი რომ აგეფარებინა პირზე დაცემინებისას, შეიძლება ჯანმრთელობა მესურვებინა...

12. მთვრალი რომ არის

უკომენტაროდ.

ასევე იხილეთ:

ბოლო ამბები:

გირჩევთ