Euphoria-ს რეჟისორი აცხადებს, რომ სერიალში გადამეტებული სექსუალიზაციის გარშემო არსებული კრიტიკის ფონზე, მესამე სეზონიდან სიდნი სვინის პერსონაჟის შიშველი სცენების სრულად ამოღებას აპირებდა, თუმცა თავად მსახიობმა ამ იდეაზე კატეგორიული უარი განაცხადა.

"როდესაც სცენარი პირველად დავწერე, ვფიქრობდი: იქნებ ეს ყველაფერი ისე გადავიღოთ, რომ საერთოდ არ იყოს სიშიშვლე? იქნებ არსებობს გზები, რომ გარკვეულ დეტალებს გვერდი ავუაროთ? მან კი შემომხედა და მითხრა: მეხუმრები? OnlyFans-ის მოდელს ვთამაშობ. მეუბნები, რომ ამ თემას, უბრალოდ, ასე გვერდი უნდა ავუაროთ?" — განაცხადა სემ ლევისომა ერთ-ერთ ინტერვიუში, როდესაც სიდნი სვინისთან ურთიერთობისა და იმ სცენების შესახებ ჰკითხეს, რომლებშიც მსახიობს მონაწილეობა ევალებოდა.

სიდნი სვინი სერიალში Euphoria.

ფოტო: HBO

რეჟისორი Euphoria-ს პირველ ორ სეზონში არსებულ იმ შიშველ სცენებზეც საუბრობს, რომელთა საჭიროებაც მაყურებელში ხშირად იწვევდა კითხვებს, განსაკუთრებით იმის ფონზე, რომ პერსონაჟები ჯერ კიდევ სკოლის მოსწავლეები იყვნენ.

სემ ლევინსონის განმარტებით, როლის მოთხოვნები სცენარიდანვე ნათელია და მსახიობებმა კასტინგზევე იციან, რომ კონკრეტული სახის სიშიშვლე იქნება საჭირო. კინომსახიობთა გილდიის წესების თანახმად, თუ მსახიობი როლზე დამტკიცების შემდეგ მსგავს სცენებში მონაწილეობაზე უარს იტყვის, მას ამას ვერავინ აიძულებს.

რეჟისორის თქმით, საუკეთესო და ყველაზე გულწრფელი შესრულება მხოლოდ მაშინ მიიღწევა, როდესაც მსახიობი თავს თავისუფლად და უსაფრთხოდ გრძნობს. ნებისმიერი სახის დაძაბულობა ბლოკავს ემოციას, რაც კარგ შედეგს გამორიცხავს.

სემ ლევინსონმა სიდნი სვინის "აბსოლუტურად უშიშარი" და "საოცრად პროფესიონალი" მსახიობიც კი უწოდა.