ორმა ამერიკელმა ოფიციალურმა პირმა და მესამე წყარომ, რომელიც სატელეფონო საუბრის დეტალებს ფლობს, Axios-ს განუცხადეს, რომ ორშაბათს გამართული საუბრისას, პრეზიდენტმა ტრამპმა ისრაელის პრემიერმინისტრი ბენიამინ ნეთანიაჰუ ლიბანში ესკალაციის გამო უცენზურო სიტყვებით გააკრიტიკა.

Axios წერს, რომ მანამდე, ირანი ისრაელის მიერ ლიბანში განხორციელებული ქმედებების გამო, აშშ-სთან მოლაპარაკებებს შეწყვეტით დაიმუქრა. წყაროების ცნობით, სატელეფონო საუბრისას ტრამპმა ნეთანიაჰუს "გიჟი" უწოდა და უმადურობაში დაადანაშაულა. მან ასევე შეაჩერა ისრაელის გეგმა ბეირუთზე დარტყმის შესახებ.

Axios-ის ცნობით, აშშ-ის ერთ-ერთმა ოფიციალურმა პირმა თქვა, რომ ტრამპმა ნეთანიაჰუს ლიბანის დედაქალაქის დაბომბვის მუქარის შესრულება ისრაელს მსოფლიოში კიდევ უფრო მეტ იზოლაციაში მოაქცევს.

ორი წყაროს ცნობით, ტრამპმა აღნიშნა, რომ ის ნეთანიაჰუს ციხეში მოხვედრისგან გადარჩენაში დაეხმარა.

აშშ-ის ოფიციალურმა პირის თქმით ტრამპმა ნეთანიაჰუს შემდეგი სიტყვებით მიმართა: "შენ, გიჟი ხარ. ჩემ გარეშე ციხეში იქნებოდი. შენს ტ***ს მე ვიცავ. ახლა ყველას სძულხარ. ამის გამო ყველას სძულს ისრაელი".

სატელეფონო საუბრის საქმის კურსში მყოფმა მეორე წყარომ თქვა, რომ ტრამპი "გაცოფებული" იყო და ერთ მომენტში ნეთანიაჰუს დაუყვირა: "რა ჯანდაბას აკეთებ?"

ამერიკელმა ოფიციალურმა პირმა აღნიშნა, რომ ტრამპმა იცოდა, რომ ჰეზბოლა ისრაელის მიმართულებით ისროდა და ისრაელს თავი უნდა დაეცვა, თუმცა ბოლო დღეებში იგრძნო, რომ ნეთანიაჰუ არაპროპორციულ ესკალაციას ახდენდა.

Axios-ის ცნობით, ბეირუთზე მუქარის გარდა, ისრაელი სამხრეთ ლიბანში სახმელეთო ოპერაციას აფართოებს.

აშშ-ის კიდევ ერთმა ოფიციალურმა პირმა თქვა, რომ ტრამპი შეშფოთებული იყო იმ ფაქტით, რომ ისრაელმა ლიბანში ამდენი მშვიდობიანი მოქალაქე მოკლა, და ეწინააღმდეგებოდა იმას, რომ ისრაელელები მთელ შენობებს ანგრევდნენ ჰეზბოლას მხოლოდ ერთი მეთაურის გასანადგურებლად.

ისრაელის ოფიციალურმა წარმომადგენელმა Axios-ს განუცხადა, რომ ისრაელი აღარ გეგმავს ბეირუთში ჰეზბოლას სამიზნეებზე დარტყმას.