ერთთვიანი მკურნალობის შემდეგ, ბათუმის კლინიკა "მედინაში" გარდაიცვალა ჩვილი, რომლის მკვლელობაც ამავე კლინიკის თანამშრომელმა, ჩვილის დედამ სცადა. ამის შესახებ ინფორმაციას თავად კლინიკა ავრცელებს. მათი ცნობით, "პაციენტს ჩაუტარდა არაერთი გადაუდებელი და მაღალკვალიფიციური სამედიცინო ჩარევა, თუმცა მისი მდგომარეობა თავიდანვე იყო უკიდურესად მძიმე".

დიდი გულისტკივილით გაცნობებთ, რომ მიუხედავად ექიმების მრავალდღიანი ინტენსიური ბრძოლისა და განხორციელებული ყველა შესაძლო სამედიცინო ღონისძიებისა, 22 თებერვალს, ირის ბორჩაშვილის ჯანმრთელობის ცენტრ "მედინაში" დაბადებული ახალშობილი (ჩვენი კლინიკის თანამშრომლის შვილი) ამ დილით გარდაიცვალა.

კლინიკის გუნდი პირველივე წუთებიდან მოქმედებდა უმაღლესი პროფესიული სტანდარტების დაცვით. პროცესში ჩართული იყვნენ როგორც ჩვენი კლინიკის, ისე მოწვეული მრავალპროფილური სპეციალისტები. პაციენტს ჩაუტარდა არაერთი გადაუდებელი და მაღალკვალიფიციური სამედიცინო ჩარევა, თუმცა მისი მდგომარეობა თავიდანვე იყო უკიდურესად მძიმე.

ამ მძიმე პერიოდში ჩვენი მთავარი საზრუნავი იყო და რჩება პაციენტების სიცოცხლისა და ჯანმრთელობის დაცვა.

ვიზიარებთ მომხდარით გამოწვეულ ღრმა ტკივილს და თანავუგრძნობთ ყველა იმ ადამიანს, ვისთვისაც ეს ტრაგედია მძიმე დანაკარგია.
მედიის წარმომადგენლებისთვის კლინიკაში ოფიციალური კომენტარი გაკეთდება 12:00 საათზე", — წერია კლინიკის მიერ გავრცელებულ ინფორმაციაში.

მიმდინარე წლის 23 თებერვალს ბათუმის კლინიკა "მედინას" თანამშრომელმა საპირფარეშოში იმშობიარა და შემდეგ ახალშობილს ყელის არეში სასიკვდილო დაზიანებები მიაყენა. კლინიკა "მედინას" კლინიკური დირექტორის, ექიმი ჯუმბერ უნგიაძის განცხადებით, ქალმაც და ახალშობილმაც დიდი რაოდენობის სისხლი დაკარგეს. ექიმის განმარტებით, ახალშობილის გადარჩენის მცირე შანსებია, ხოლო ქალს კი ფსიქიატრიული შემოწმება უტარდება.