შინაგან საქმეთა სამინისტროს ინფორმაციით, გურიის პოლიციის დეპარტამენტის თანამშრომლებმა, განზრახ მკვლელობის ბრალდებით 2002 წელს დაბადებული გ.ჩ. დააკავეს.

გამოძიებამ დაადგინა, რომ ბრალდებულმა მეზობლად მცხოვრებ პირს საკუთარ საცხოვრებელ სახლში, ურთიერთშელაპარაკების ნიადაგზე, ცივი იარაღის გამოყენებით დაზიანება მიაყენა და შემთხვევის ადგილიდან მიიმალა — მიყენებული დაზიანების შედეგად მეზობელი ადგილზე გარდაიცვალა.

"სამართალდამცველების მიერ, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად დგინდება, რომ ბრალდებულმა, ოზურგეთის მუნიციპალიტეტის ერთ-ერთ სოფელში,

მეზობლად მცხოვრებ — 1968 წელს დაბადებულ გ.მ.-ს, საკუთარ საცხოვრებელ სახლში, ურთიერთშელაპარაკების ნიადაგზე, ცივი იარაღის გამოყენებით დაზიანება მიაყენა და შემთხვევის ადგილიდან მიიმალა.

მიყენებული დაზიანების შედეგად გ.მ. ადგილზე გარდაიცვალა.

სამართალდამცველებმა ჩატარებული საგამოძიებო მოქმედებების შედეგად, გ.ჩ. ბრალდებულის სახით ცხელ კვალზე დააკავეს.

დანაშაულის ჩადენის იარაღი — დანა ნივთმტკიცებადაა ამოღებული," — წერს უწყება.

ტვ პირველის ინფორმაციით, 23 წლის კაცმა მეზობელზე თავდასხმა კომპიუტერული თამაშის დროს უცხო პირისგან მიღებული დავალების საფუძველზე განახორციელა. დაკავებულის მამის განცხადებით, მისი შვილი ღამით ტყეში იპოვეს, მას თვითდაზიანებები ჰქონდა მიყენებული.

"აზრზე არ ვარ რას აკეთებდა, კომპიუტერთან იჯდა 24 საათი. ღამის 04:00 საათზე იძინებდა და პირველზე დგებოდა ლოგინიდან. მეზობლის მკვლელობის შემდეგ, ტყეში გაიქცა. ვნახეთ, რომ თვითონაც გადაუჭრია ვენები.

გამომძიებლები დაინტერესდნენ [რა სახის კომპიუტერულ თამაშებს თამაშობდა], თუმცა მე არაფერი ვიცი. სახლი გაჩხრიკეს, წაიღეს სისხლიანი ტანსაცმელი, ტელეფონი და კომპიუტერი," — განაცხადა დაკავებულის მამამ.

გამოძიება სისხლის სამართლის კოდექსის 108-ე მუხლით მიმდინარეობს, რაც 15-წლამდე ვადით თავისუფლების აღკვეთას ითვალისწინებს.