დონალდ ტრამპის მუქარას იმის შესახებ, რომ ირანს ჰორმუსზის სრუტის გასახსნელად 48 საათი აქვს, ირანის რევოლუციური გვარდია გამოეხმაურა. მათ განცხადებაში ნათქვამია, რომ ირანი საკუთარ ელექტროენერგიის სექტორზე თავდასხმას ისრაელის ელექტროსადგურების დაბომბვით უპასუხებს. ამის შესახებ ინფორმაციას The Times of Israel ავრცელებს.

"ჩვენ მტკიცედ გვაქვს გადაწყვეტილი, ვუპასუხოთ ნებისმიერ საფრთხეს იმავე დონეზე... თუ თქვენ დაარტყამთ ელექტროენერგიას, ჩვენც დავარტყამთ ელექტროენერგიას", — აცხადებს რევოლუციური გვარდია.

მათი მტკიცებით ტრამპი ტყუის, როცა აცხადებს, რომ ირანი წყლის გამწმენდ ქარხნებზე თავდასხმას გეგმავს.

"მატყუარა... აშშ-ის პრეზიდენტმა განაცხადა, რომ რევოლუციური გვარდია აპირებს წყლის გამწმენდ ქარხნებზე თავდასხმას და რეგიონის ქვეყნების მოსახლეობისთვის სირთულეების შექმნას", — ნათქვამია სახელმწიფო მედიის მიერ გავრცელებულ განცხადებაში.

მანამდე აშშ-ის პრეზიდენტმა, დონალდ ტრამპმა სოციალურ ქსელში დაწერა, რომ ირანს ჰორმუზის სრუტის სრულად გასახსნელად 48 საათს აძლევს. წინააღმდეგ შემთხვევაში მან ირანის სხვადასხვა ელექტორადგურზე დარტყმით დაიმუქრა.

"თუ ირანი ამ მომენტიდან 48 საათის განმავლობაში სრულად არ გახსნის ჰორმუზის სრუტეს, ყოველგვარი საფრთხის გარეშე, ამერიკის შეერთებული შტატები დაარტყამს და გაანადგურებს მათ სხვადასხვა ელექტროსადგურს, დაწყებული ყველაზე დიდიდან!" — დაწერა პრეზიდენტმა სოციალურ ქსელში.