"არ მქონდა კომუნიკაცია, არანაირი საშვი. რომ მქონოდა, ვიქნებოდი იქ, სადაც შესაძლებელი იქნებოდა, მაგრამ აქვე ვიყავი სიონის წინ და მე ამითაც ძალიან ბედნიერი ვარ", — ამის შესახებ საქართველოს მეხუთე პრეზიდენტმა, სალომე ზურაბიშვილმა "ტვ პირველთან" საუბრისას განაცხადა.

მისი განმარტებით, არ აქვს მნიშვნელობა ვინ სად იდგა, მთავარია, რომ ყველა იდგა და ყველამ გამოხატა პატრიარქის წასვლასთან დაკავშირებული განწყობა, წუხილი და ტკივილი. მან ასევე გამოთქვა იმედი, რომ ერთობა, რომელიც შედგა, შენარჩუნდება.

"მინდა, ყველას მივუსამძიმრო, რადგან დღეს ეს არის ჩვენი ყველას ერთობლივი დიდი წუხილი, რომელსაც ერთად ვიზიარებთ. ეს არის ყველაზე მნიშვნელოვანი. ალბათ არ აქვს მნიშვნელობა, არის სხვა მიზეზები პროტოკოლი თუ სხვა, არ აქვს მნიშვნელობა, ვინ სად იდგა დღეს, ვინ სად შემოვიდა და ვინ ვერ შემოვიდა. დღეს მნიშვნელობა იმას ჰქონდა, რომ ყველანი ვიდექით და ყველამ გამოვხატეთ პატრიარქის წასვლასთან დაკავშირებული ჩვენი განწყობა, წუხილი, ტკივილი. ამავე დროს, გვაქვს დიდი იმედი, რომ ის ჩვენ ამ ძალიან მძიმე დროს დაგვეხმარება იმაში, რომ ის ერთობა, რომელიც დღეს შედგა, ერთობა, რომელიც ბევრს არ მოსწონს და არ უნდა, ამ ერთობას შევინარჩუნებთ. მგონი, რომ პატრიარქი ამის ძალას ნამდვილად მოგცემს.

...არ მქონდა კომუნიკაცია, არანაირი საშვი. რომ მქონოდა, ვიქნებოდი იქ, სადაც შესაძლებელი იქნებოდა, მაგრამ აქვე ვიყავი სიონის წინ და მე ამითაც ძალიან ბედნიერი ვარ", — განაცხადა სალომე ზურაბიშვილმა.

შეგახსენებთ, მიმდინარე წლის 17 მარტს, 93 წლის ასაკში სრულიად საქართველოს კათოლიკოს-პატრიარქი ილია II გარდაიცვალა. 17 მარტის დილას, ილია II-ის ჯანმრთელობის მდგომარეობა გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს და ჯანმრთელობის კრიტიკული მდგომარეობის გამო მართვით სუნთქვაზე იმყოფებოდა.

სრულიად საქართველოს კათოლიკოს-პატრიარქის, ილია II-ის გარდაცვალების გამო საქართველოში გლოვა გამოცხადდა. პატრიარქი 22 მარტს სიონის საკათედრო ტაძარში დაკრძალეს.