ევროპის საბჭოს "ჟურნალისტების უსაფრთხოების პლატფორმამ" (Council of Europe Safety of Journalists Platform) საქართველოში ჟურნალისტებისა და დამოუკიდებელი მედიასაშუალებების წინააღმდეგ მიმდინარე სამართლებრივ დევნასთან დაკავშირებით განგაშის სიგნალები ჩართო.

პლატფორმის ერთ-ერთ ანგარიშში საუბარია გამოცემა "ნეტგაზეთის" ჟურნალისტის, მარიამ ძიძარიას წინააღმდეგ დაწყებულ ადმინისტრაციულ დევნაზე. ინციდენტი 2026 წლის 31 იანვარს მოხდა, როდესაც ძიძარია თბილისში საპროტესტო აქციას აშუქებდა. მიუხედავად იმისა, რომ ჟურნალისტს ეკეთა პრესის ამოსაცნობი ნიშანი და ასრულებდა პროფესიულ მოვალეობას, შსს-ს პატრულ-ინსპექტორმა მას ბრალი "გზის გადაკეტვაში" დასდო.

პლატფორმა წერს, რომ აღნიშნული მუხლი ადმინისტრაციულ პატიმრობას ითვალისწინებს, ხოლო სამართალდარღვევის განმეორების შემთხვევაში — სისხლისსამართლებრივ პასუხისმგებლობას. პლატფორმა მიიჩნევს, რომ ეს ჟურნალისტურ საქმიანობაში უხეში ჩარევაა.

პლატფორმამ განგაშის სიგნალი ჩართო კიდევ ერთ საქმეზე, რომელიც ტელეკომპანია "კავკასიასა" და მისი დირექტორის, ნინო ჯანგირაშვილის წინააღმდეგ დაწყებულ წარმოებას ეხება. კომუნიკაციების ეროვნულმა კომისიამ მაუწყებლისგან დეტალური ინფორმაცია მოითხოვა აშშ-დან მიღებული კერძო შემოწირულობის შესახებ.

კომისია "მაუწყებლობის შესახებ" კანონში 2025 წელს შესულ ცვლილებებს ეყრდნობა, რომლებიც ე.წ. "უცხოური ძალებისგან" დაფინანსების მიღებას კრძალავს.

ორივე საქმე კლასიფიცირებულია როგორც "მედიის თავისუფლებაზე თავდასხმის" შემთხვევა.