"მათ [ლელოს] ჩვენთან ან ჩვენ მათთან არაფერი სალაპარაკო არ გვაქვს, ელაპარაკონ საკონსტიტუციო სასამართლოს და მათმა ზოგიერთმა წევრმა ელაპარაკოს სისხლის სამართლის სასამართლოს", — განაცხადა შალვა პაპუაშვილმა "ლელო ძლიერი საქართველოს" ინიციატივაზე კომენტარისას.

ცნობისათვის, გუშინ გამართულ ბრიფინგზე "ლელო ძლიერი საქართველოს" წევრებმა განაცხადეს, რომ აუცილებელია დიალოგის დაწყება ოპოზიციასა და "ქართულ ოცნებას" შორის.

"რაც შეეხება რადიკალურ ჯგუფებს, მათ პრობლემა არ აქვთ საქართველოს ხელისუფლებასთან, მათ პრობლემა აქვთ საქართველოს კონსტიტუციასთან. თუკი რამესთან დაკავშირებით უნდა ილაპარაკონ, უნდა ილაპარაკონ კონსტიტუციის და სისხლის სამართლის საკითხებზე, რომელიც მათ ასე უხვად აქვთ დარღვეული. ლელოსაც რაც შეეხება, მათ ჩვენთან ან ჩვენ მათთან არაფერი სალაპარაკო არ აქვთ, ელაპარაკონ საკონსტიტუციო სასამართლოს და ელაპარაკოს მათმა ზოგიერთმა წევრმა სისხლის სამართლის სასამართლოს, სადაც მათთან დაკავშირებით საქმეები არის. პრობლემა არის არა ის, რომ პოლიტიკური დიალოგი არ არსებობს, ითხოვენ პოლიტიკურ დიალოგს კონსტიტუციის დამრღვევები და სისხლის სამართლის დამნაშავეები", — განაცხადა შალვა პაპუაშვილმა.

მათი განმარტებით, საქართველო საერთაშორისო იზოლაციიდან პოლიტიკურ პროცესში მნიშვნელოვანი გადატვირთვის გარეშე ვერ გამოვა. ლელო — ძლიერი საქართველო წერს, რომ აუცილებელია, გადაილახოს ურთიერთდაპირისპირების, ურთიერთგანადგურების დამანგრეველი ლოგიკა და დაიწყოს პასუხისმგებლიანი პოლიტიკური მოლაპარაკებები ქართულ ოცნებასა და იმ ოპოზიციურ პარტიებს შორის, რომლებმაც 2024 წლის საპარლამენტო არჩევნებში საქართველოს მოსახლეობის უმრავლესობის მხარდაჭერა მოიპოვეს მიუხედავად არჩევნების არადემოკრატიულად ჩატარებისა და ქართული ოცნების მხრიდან ოფიციალური შედეგების რეალობის გაყალბებისა.