"ქართული მხრიდან არანაირი თხოვნა ან მოწოდება არ ყოფილა, მაგრამ მეორე მხრივ, ჩვენ გვაქვს საერთო დღის წესრიგი, რომელზეც ვმუშაობთ", — ამის შესახებ სომხეთის რესპუბლიკის პრემიერმინისტრმა ნიკოლ ფაშინიანმა დღეს, 12 მარტს, მთავრობის შენობაში ჟურნალისტებთან ბრიფინგზე განაცხადა, როდესაც ჰკითხეს, იყო თუ არა ქართული მხარის მოთხოვნა, რომ ევროპარლამენტში გამოსვლისას ეხსენებინა, რომ სომხეთის ევროკავშირში გაწევრიანების გზაზე ყველაზე დიდი პრობლემა ევროკავშირსა და საქართველოს შორის გაყინული პოლიტიკური დიალოგია.

"მე ჩემი შეშფოთება ევროპარლამენტის ტრიბუნიდან გამოვთქვი, რადგან, მართლაც, ჩვენ შეშფოთებულები ვართ ევროკავშირ-საქართველოს ურთიერთობებში არსებული ვითარებით, ეს გვაშფოთებს", — თქვა მან.

ცნობისათვის, გუშინ ევროპარლამენტში სიტყვით გამოსვლისას სომხეთის პრემიერმა განაცხადა, რომ "სომხეთის ევროკავშირში ინტეგრაციის გზაზე ამჟამად ყველაზე დიდი პრობლემა ევროკავშირსა და საქართველოს შორის პოლიტიკური დიალოგის გაყინული მდგომარეობაა".

"გულწრფელად უნდა ვთქვა, რომ სომხეთის ევროკავშირში ინტეგრაციის გზაზე ამჟამად ყველაზე დიდი პრობლემა ევროკავშირსა და საქართველოს შორის პოლიტიკური დიალოგის გაყინული მდგომარეობაა. საქართველო ჩვენთვის ევროკავშირისკენ მიმავალი გზაა. და ჩვენ ევროკავშირში სომხეთის გაწევრიანების პროცესის დაწყების შესახებ კანონი მივიღეთ მას შემდეგ, რაც საქართველომ ევროკავშირის წევრობის კანდიდატის სტატუსი მიიღო. ეს სომხეთის ევროკავშირში გაწევრიანების პერსპექტივას უფრო ხელშესახებს ხდიდა და ჩვენი მოლოდინი და თხოვნაა, რომ ევროკავშირ-საქართველოს კონსტრუქციული პროცესი განვითარდეს. ეს სომხეთისთვის ისეთივე მნიშვნელოვანია, როგორც საქართველოსთვის“, — განაცხადა სომხეთის პრემიერმა, ნიკოლ ფაშინიანმა ევროპარლამენტში სიტყვით გამოსვლისას ("ნეტგაზეთის" თარგმანი).