როსალია ბოლო პერიოდში ისევ მოექცა მედიისა და საზოგადოების განსაკუთრებული ყურადღების ცენტრში. კატალონიელმა მუსიკოსმა შარშან ნოემბერში რიგით მე-4 სტუდიური ალბომი, კვლავაც ჟანრობრივი მრავალფეროვნებით გამორჩეული ახალი ნამუშევარი, Lux, გამოუშვა, რომელიც არაერთმა კრიტიკოსმა და გამოცემამ, მათ შორის, The Guardian-მა, 2025 წლის საუკეთესო ალბომადაც დაასახელა. ალბომის მთავარი სინგლი, Berghain, რომელიც ლეგენდარულ ისლანდიელ მუსიკოსთან, ბიორკთან, კოლაბორაციით ჩაიწერა, მრავალი ქვეყნის ჩარტებშიც აღმოჩნდა.

სწორედ Lux-ს, დაგეგმილ მსოფლიო ტურნესა და სხვა სიახლეებს შეეხებოდა უახლესი ინტერვიუ როსალიასთან, რომელიც ცნობილმა არგენტინელმა მწერალმა მარიანა ენრიკესმა ჩაწერა. ინტერვიუს ნაწილი იყო ეგრეთ წოდებული პრუსტის კითხვარი, რომელიც მე-19 საუკუნეში შეიქმნა, მაგრამ დღემდე პოპულარობით სარგებლობს. მის ერთ-ერთ შეკითხვაზე, რომელ თვისებას აფასებ კაცში ყველაზე მეტადო, როსალიამ ისეთი მოულოდნელი პასუხი გასცა, ენრიკესმა სიცილი ვერ შეიკავა.

"გეი რომ არის", — უპასუხა მომღერალმა ყოყმანის გარეშე და არგენტინელმაც კვერი დაუკრა, ერთ აზრზე ვართო.

ხუმრობას როსალიამ სერიოზული ტონით მოაყოლა, რომ მისთვის გაუგებარია, რატომ არის შეკითხვა ორ ნაწილად გაყოფილი: გამორჩეული თვისება კაცში და ქალში. მე ვიკითხავდი, ზოგადად, ადამიანში რომელი თვისება გხიბლავსო, ამატებს მუსიკოსი. ენრიკესი კი ხსნის, იმ პერიოდში ორობითი სისტემა იყო ფესვგადგმულიო.

აღსანიშნავია, რომ შემოქმედებით კარიერასთან ერთად, როსალიას აქტივიზმიც გამოარჩევს. მუსიკოსი აქტიურად უჭერს მხარს ქალების და ლგბტქ ადამიანების უფლებებს. რაც შეეხება იდენტობას, პოპვარსკვლავი იარლიყებზე მორგების წინააღმდეგია: მისი თქმით, თავს არ აიძულებს, საკუთარი სექსუალობა განსაზღვროს. თავისუფლებას მივყვებიო, აღნიშნავს მუსიკოსი ჟურნალ Elle-თან ინტერვიუში.

როსალიას რომანტიკული ურთიერთობა ჰქონდა ცნობილ ამერიკელ ტრანსგენდერ მსახიობთან ჰანტერ შაფერთან. მოგვიანებით, იგი პუერტორიკოელ მომღერალ რაუ ალეხანდროზე იყო დანიშნული, თუმცა, წყვილი 2023 წელს დაშორდა. ამ წლის დასაწყისში ესპანურენოვანი ტაბლოიდები აქტიურად წერდნენ, რომ როსალია UFC-ის ქართველ ვარსკვლავს, ილია თოფურიას, ხვდებოდა, მაგრამ გავრცელებული ხმები არ დადასტურდა.