თბილისის საქალაქო სასამართლოში გიგა ავალიანის მკვლელობის საქმეზე ექსპერტები გამოიკითხნენ. საქმის პროკურორის, ლევან ვეფხვაძის განცხადებით, ექსპერტიზის დასკვნით დაცვის მხარის პოზიცია არ აღმოჩნდა სიმართლე — გიგა ავალიანი არა დაცემისგან, არამედ ბრალდებულების მიერ განხორციელებული ქმედების შედეგად გარდაიცვალა.

პროკურორმა ასევე განმარტა, რომ თავდასხმამდე გიგა ავალიანი დედის დაბადების დღის აღსანიშნავად ემზადებოდა, რა დროსაც ბრალდებულები მასზე თავდასხმას გეგმავდნენ.

"სამედიცინო ექსპერტმა ცალსახად დაადასტურა, რომ გიგა ავალიანს მიყენებული აქვს დაზიანება წინ, შუბლის მიდამოში, საიდანაც დაიწყო მოტეხილობის ბზარი და გაგრძელდა უკან მიმართულებით. შესაბამისად, სპეკულაციას ექსპერტებმა დაუსვეს წერტილი.

მინდა აღვნიშნო, რომ მაშინ, როდესაც გიგა ავალიანი ემზადებოდა დედის დაბადების დღის აღსანიშნავად, ბრალდებულები ემზადებოდნენ გიგა ავალიანისთვის ძალადობის განსახორციელებლად. მაშინ, როდესაც გიგა ავალიანი ყიდულობდა სახლისათვის პროდუქტებს, ბრალდებულები ყიდულობდნენ ელექტრო შოკს და სხვა საგნებს. ეს არის მოცემულობა, რომელიც ამ საქმეში არის რეალობა და გიგა ავალიანი ზუსტად ბრალდებულების მიერ განხორციელებული ქმედების შედეგად გარდაიცვალა," — განაცხადა პროკურორმა. (წყარო IPN)

1-ელ ოქტომბერს, თემქის დასახლებაში, ერთ-ერთი საცხოვრებელი კორპუსის მიმდებარე ტერიტორიაზე, 28 წლის მათემატიკის მასწავლებელსა და ექიმს, გიგა ავალიანს თავს დაესხნენ. თავდასხმისას მიღებული მძიმე თავის ტრავმით ავალიანი საავადმყოფოში მოათავსეს, სამ კვირაში კი, 24 ოქტომბერს გარდაიცვალა.

10 თებერვალს, პროკურატურის ბრიფინგზე ცნობილი გახდა, რომ გიგა ავალიანის მკვლელობისთვის 3 არასრულწლოვან ბრალდებულს ბრალდება დაუმძიმდა. ბრიფინგზე ასევე ცნობილი გახდა, რომ 3 ბრალდებულს ჯგუფური დანაშაული წარსულშიც ჩაუდენიათ — უწყება მათ ჯგუფური თავდასხმის 4 ეპიზოდზე ედავება.

მოკლული მასწავლებლის, გიგა ავალიანის მკვლელობის ფიგურანტ 3 ბრალდებულს 9-დან 14 წლამდე პატიმრობა ემუქრება ხუთივე ეპიზოდში გ.რ. მონაწილეობდა, ოთხ ეპიზოდში — დ.ჩ., ხოლო ა.გ. მხოლოდ ორ ეპიზოდში.

გიგა ავალიანის საქმეზე ა.გ.-ს და გ.რ.-ს ბრალი საქართველოს სისხლის სამართლის კოდექსის 117-ე მუხლის მე-4 ნაწილით აქვს წარდგენილი, რაც (ჯანმრთელობის განზრახ მძიმე დაზიანებას, ჩადენილი ჯგუფურად რამაც გამოიწვია სიცოცხლის მოსპობა) 14 წლამდე თავისუფლების აღკევთას გულისხმობს. დ.ჩ.-ს ბრალი სსკ-ის 8, 117-ე მუხლის მე-3 ნაწილის "ლ" ქვეპუნქტით აქვს წაყენებული, რაც ჯგუფური ძალადობის დაგეგმვას გულისხმობს.

მეტი გიგა ავალიანის საქმეზე: