Paramount-ის ინვესტორთა კრებაზე, გენერალურმა დირექტორმა, დევიდ ელისონმა, განაცხადა, რომ Paramount+ და HBO Max გაერთიანდება და ერთიან სტრიმინგ პლატფორმას ჩამოაყალიბებს.

"მომავალი წლების განმავლობაში ორივე კომპანიის სტრიმინგ პორტფოლიოს ერთ, უფრო ძლიერ პლატფორმაში გავაერთიანებთ," — განაცხადა ელისონმა.

ამჟამინდელი მდგომარეობით, ამ ორ პლატფორმას მსოფლიოს 100-ზე მეტ ქვეყანაში, ჯამში, 200 მილიონზე მეტი მომხმარებელი ჰყავს

ეს სტრიმინგ პლატფორმების ისტორიაში ერთ-ერთი ყველაზე მასშტაბური გაერთიანება იქნება. თუმცა, ერთიანი სერვისის პირობებში, 200-მილიონიანი მაჩვენებელი, სავარაუდოდ, შემცირდება, რადგან ბევრ მომხმარებელს ორივე პლატფორმა აქვს გამოწერილი.

ფოტო: Justin Sullivan/Getty Images

გასული წლის მეოთხე კვარტლის მონაცემებით, Paramount-ს 78.9 მილიონი გამომწერი ჰყავდა, ხოლო Warner Bros. Discovery-ს (HBO Max-ის მშობელი კომპანია) — 131.6 მილიონი.

შედარებისთვის, როდესაც Warner Bros. Discovery და Netflix შერწყმის შესახებ მოლაპარაკებებს მართავდნენ, Netflix-ის გენერალურმა დირექტორმა, ტედ სარანდოსმა, განაცხადა, რომ HBO Max-ის გამომწერთა 80%-ს Netflix-ის ანგარიშიც აქვს. როგორც ცნობილია, Netflix-ის გამომწერთა რაოდენობამ ცოტა ხსნის წინ 325 მილიონს გადააჭარბა.

ფოტო: Netflix

HBO Max-ისა და Paramount+-ის გაერთიანებული სტრიმინგ პლატფორმა ორივე კომპანიის წამყვან ფრენჩაიზებს მოუყრის თავს — დაწყებული HBO Max-ის სატახტო თამაშებით და სოპრანოს კლანით, დასრულებული Paramount-ის Yellowstone-თა და Star Trek-ით.

ფოტო: HBO Max

ახალი, გაერთიანებული სტრიმინგ პლატფორმის სახელი ჯერჯერობით არაა ცნობილი. თუმცა ეს პროცესი, სავარაუდოდ, Warner Bros. Discovery-ს მორიგ რებრენდინგს გამოიწვევს. აღსანიშნავია, რომ გასულ ზაფხულს, პლატფორმა კვლავ HBO Max-ად გადაკეთდა — მას შემდეგ, რაც ორი წელი მხოლოდ Max ერქვა, მანამდე კი — HBO Now-სა და თავდაპირველი HBO Max-ის ეტაპები გაიარა.

შერწყმის ფარგლებში, Paramount ტელეკომპანია CNN-საც შეიძენს, რომელიც ამჟამად Warner Bros. Discovery-ის მფლობელობაშია.