თბილისის მერი კახა კალაძე აშშ-ს სახელმწიფო მდივან მარკო რუბიოსა და "ოცნების" დანიშნულ პრეზიდენტ მიხეილ ყაველაშვილს შორის შემდგარი კონტაქტისას გაჟღერებულ გზავნილებს გამოეხმაურა. მისი თქმით, მარკო რუბიოსა და მიხეილ ყაველაშვილს შორის შემდგარი კონტაქტისას გაჟღერებული გზავნილები ძალიან მნიშვნელოვანია.

"ძალიან მნიშვნელოვანი გზავნილია. ჩვენ ბევრჯერ გვისაუბრია და კიდევ ერთხელ გავიმეორებთ, რომ მზად ვართ, ურთიერთობები განვაახლოთ, დავიწყოთ ახალი ფურცლით, მოვახდინოთ გადატვირთვა. საქართველოს ხელისუფლება ამ ყველაფრისთვის მზად არის და მივესალმებით ამ დამოკიდებულებას, რაზეც იყო საუბარი. მოლოდინიც, რა თქმა უნდა, არის.

საქართველოს ხელისუფლებამ გადადგა ნაბიჯი და ვამბობთ, რომ ჩვენთვის კატეგორიულად მიუღებელია ის უსამართლო დამოკიდებულება, რაც იყო ბაიდენის ადმინისტრაციის პირობებში. ჩვენ ვართ დამოუკიდებელი, სუვერენული სახელმწიფო და ამ ქვეყნის ბატონ-პატრონი გახლავთ, მისი აღმატებულება, ქართველი ხალხი. პატარა ქვეყანა ვართ, მაგრამ პატივი უნდა სცენ ჩვენს წარსულს, ჩვენს კულტურას, ტრადიციებს, სუვერენიტეტსა და დამოუკიდებლობას.ამასთან ვთქვით, რომ ახალი პრეზიდენტის და ადმინისტრაციის პირობებში, საქართველოს ხელისუფლება მზად არის ურთიერთობები დაიწყოს ახალი ფურცლით.

ის დამოკიდებულება, რაც ჰქონდა ბაიდენის ადმინისტრაციას, კატეგორიულად მიუღებელი იყო იმიტომ, რომ მხოლოდ და მხოლოდ ტყუილი, არასამართლიანი დამოკიდებულება, სიცრუე, თუნდაც იგივე სანქციებთან დაკავშირებით - არანაირი არგუმენტი და განმარტება", — განაცხადა კახა კალაძემ.

ცნობისათვის, მიხეილ ყაველაშვილის ადმინისტრაციის მიერ გავრცელებულ ინფორმაციის თანახმად, მარკო რუბიომ აღნიშნა, რომ "საკმაოდ დიდი ნეგატივი დახვდათ წინა ადმინისტრაციისგან საქართველოსთან მიმართებაში. ... წინა ორშაბათს სწორედ ამ თემის განხილვას ჰქონდა ადგილი, მათ ძალიან კარგად გაიარეს, გაანალიზეს ეს პროცესი, პროცესში არიან, რომ გაწმინდონ ეს ნეგატივი ჩვენს ურთიერთობებში და უახლოეს მომავალში აუცილებლად სათანადოდ მოემზადებიან იმისთვის, რომ ჩვენი ურთიერთობები შედგეს“, — გთქვა "ოცნების" დანიშნულმა პრეზიდენტმა, მიხეილ ყაველაშვილმა სამთავრობო ტელეკომპანია "იმედის" ეთერში მილანში ვიზიტზე საუბრისას, სადაც ზამთრის XXV ოლიმპიურ თამაშებს დაესწრო.