ოცნების პარლამენტის თავმჯდომარემ, შალვა პაპუაშვილი ბრიფინგზე დაადასტურა, რომ "გრანტების შესახებ კანონში ცვლილებების" განხილვისას დაემატება ჩანაწერი კონსტიტუციური ორგანოების არაღიარებაზე სისხლის სამართლებრივი სასჯელის დაკისრების შესახებ. მისი თქმით, კანონპროექტის მეორე მოსმენისას "კონკრეტული ფორმულირება იქნება, რა არის დასჯადი".

"პირველი მოსმენით ეს დებულება უკვე მიღებულია, რაც შეეხება კონსტიტუციური წესრიგის არაღიარებას, კონსტიტუციური ორგანოების არაღიარებას, მეორე მოსმენისთვის კონკრეტული ფორმულირება იქნება, თუ რა კონკრეტული ქმედება არის დასჯადი და რა სანქციები იქნება ამისთვის გათვალისწინებული. ...საუბარი არ არის მიხეილ ყაველაშვილზე ან კონკრეტულ ადამიანზე, აქ საუბარია საქართველოზე, როგორც სახელმწიფოზე, მის აღიარებასა და მისი კონსტიტუციური ორგანოების აღიარებაზე. ჩვენი სახელმწიფოს აღიარება ზოგიერთ უცხოელს ხაჭაპურის აღიარება ჰგონია", — თქვა შალვა პაპუაშვილმა.

ჟურნალისტის კითხვაზე — სალომე ზურაბიშვილი ამბობს, რომ არ აღიარებს მიხეილ ყაველაშვილს, ქართული ოცნების პარლამენტს, შეიძლება დაიჭიროთ სალომე ზურაბიშვილი?, პაპუაშვილმა უპასუხა, რომ "კონკრეტული კანონი არ ეხება ადამიანებს. ეს ეხება გამოწვევებს, რომელიც არის უცხოური ჩარევა საქართველოში. რადგან ესეც გარე ჩარევის ერთ-ერთი ინსტრუმენტია, როდესაც საქართველოს კონსტიტუციური წესრიგს ძირი საქართველოს კონსტიტუციური ორგანოების ლეგიტიმაციაზე თავდასხმით გამოუთხარონ და ამის სახელმწიფო გაგვიუქმონ", — თქვა პაპუაშვილმა.