SOU ფესტივალმა, რომელიც თბილისში ლეგენდარული ისლანდიელი მომღერლის Björk-ის კონცერტის ორგანიზატორია, ფეისბუკზე დაწერა თუ რატომ არის ბილეთების შემოთავაზებული ფასი ყველაზე იაფი:

"ნამდვილად არ გვჭირდება იმის ახსნა, რომ საქართველოში 300 ლარის საშუალო ფასთან მიმართებაში "იაფი" დამაჯერებლად არ ჟღერს, თუმცა თუკი გადავხედავთ ბიორკის კონცერტების საშუალო ფასს მთელს მსოფლიოში (გასული 12 თვის განმავლობაში ბიორკის კონცერტზე დასასწრებად რამდენჯერმე მეტს, საშუალოდ არანაკლებ 900 ლარის ექვივალენტს იხდიდნენ, ყველაზე ძვირადღირებული ბილეთების ფასი 5,212 ლარს შეადგენდა, ხოლო ყველაზე იაფი – 190 ლარს) ნათელია, რომ SOU-ს ფარგლებში ამ რანგის კონცერტზე მოსახვედრად გადასახდელ ფასთა დიაპაზონი მართლაც მინიმალურია".

მათივე თქმით, კონცერტზე დასასწრები ადგილების რაოდენობა სამი ათასამდეა შეზღუდული, რადგან თვითონ მომღერლის მიერ შერჩეული ფილარმონიისა და ოპერის ინფრასტრუქტურა მეტის საშუალებას არ იძლევა:

"ამას კიდევ უფრო უნდა გაეძვირებინა საქართველოში ღონისძიების ჩატარება უცხოელი კოლეგების საშუალო ფასთან შედარებით. ამიტომ SOU Fest-ი საგანგებო მადლობას უხდის არტისტსა და მთელ საორგანიზაციო გუნდს, რომ გაითვალისწინა ქვეყნის ეკონომიკური სპეციფიკა".

კონცერტის ორგანიზატორების თქმით, ყველა ამ გარემოებიდან გამომდინარე კონცერტის გამართვა ძვირი ჯდება, მაგრამ სპონსორების დახმარებით ბილეთის საშუალო ფასი მინიმალურ ფასს არ აჭარბებს.

SOU ფესტივალის განცხადებით, ბიორკის ღონისძიებას Check in Georgia მხოლოდ ტექნიკური და საინფორმაციო მხარდაჭერით დაეხმარა.

შეგახსენებთ, რომ თბილისში ისლანდიელი მუსიკოსის Björk-ის ორი სოლოკონცერტი გაიმართება.

კონცერტი გაიმართება:

  • თბილისის საკონცერტო დარბაზში კონცერტი 31 ოქტომბერს, 21:00-ზე დაიწყება. ბილეთების შეძენა ორშაბათს დილის 10:00-დან იქნება შესაძლებელი, საკონცერტო დარბაზის სალაროებსა და www.tkt.ge-ზე. ფასი: 50 ლარიდან - 570 ლარამდე
  • თბილისის ოპერისა და ბალეტის სახელმწიფო თეატრში კონცერტი 3 ნოემბერს, 21:00-ზე დაიწყება. ბილეთების შეძენა ორშაბათს დილის 10:00-დან იქნება შესაძლებელი, ოპერის სალაროებსა და www.tkt.ge-ზე. ფასი: 80 ლარიდან -750 ლარამდე.