ოპოზიციონერი პოლიტიკოსის, თეონა აქუბარდია "ტვ პირველთან" საუბრისას აცხადებს, რომ მან გაუფორმა ოცნების პრემიერს, ირაკლი კობახიძეს კონტრაქტი 2012 წელს საქართველოს განვითარების კვლევით ინსტიტუტში იმისთვის, რომ მას სამართლებრივი ანალიზი დაეწერა მოქალაქეთა პოლიტიკური გაერთიანების შესახებ, ახლა კი ცრუობს, როდესაც ამბობს, რომ მას არასამთავრობო ორგანიზაციაში არ უმუშავია.

"მე თავად ვიყავი ის პირი, რომელმაც ირაკლი კობახიძეს გაუფორმა კონტრაქტი 2012 წელს საქართველოს განვითარების კვლევით ინსტიტუტში იმისთვის, რომ მას სამართლებრივი ანალიზი დაეწერა მოქალაქეთა პოლიტიკური გაერთიანების შესახებ იმ დრაკონული კანონის ირგვლივ.

ეს ანალიზი ჩვენ, მათ შორის, გავასაჯაროვეთ „თბილისი მარიოტში“, სადაც, სხვათა შორის, ის არ მოვიდა ამ ღონისძიებაზე, მიუხედავად იმისა, რომ დასკვნა თავად დაწერა სხვა ექსპერტებთან ერთად, იმიტომ, რომ "ნაციონალური მოძრაობის" დროს საშიში იყო კრიტიკული პოზიციის საჯაროდ გამოხატვა. ეს კიდევ ერთხელ აჩვენებს იმას, რომ ის არასამთავრობო სექტორში მუშაობდა და დღეს გატყუებთ, როდესაც ამბობს, რომ არასდროს ყოფილა არასამთავრობო ორგანიზაციის წევრი", — განაცხადა თეონა აქუბარდიამ "ტვ პირველთან".

30 იანვარს ოცნების პარლამენტის თავმჯდომარემ, შალვა პაპუაშვილმა ბრიფინგზე თქვა, რომ არც ის, არც ირაკლი კობახიძე "არ ყოფილა NGO-ში".

"მე NGO-ში არ ვყოფილვარ, არც ირაკლი კობახიძე არ ყოფილა NGO-ში, არც მე არც ირაკლი კობახიძე — ჩვენ NGO-ში არ ვიყავით", — განაცხადა ოცნების პარლამენტის თავმჯდომარემ შალვა პაპუაშვილმა ბრიფინგზე ჟურნალისტის კითხვის საპასუხოდ — ჰქონდათ თუ არა მას და ირაკლი კობახიძეს ეგ ე.წ. "გაგრილების პერიოდი", NGO-დან პოლიტიკაში რომ მოვიდნენ.

შეგახსენებთ, რომ 28 იანვარს ფრაქცია ქართული ოცნების თავმჯდომარემ, ირაკლი კირცხალიამ ბრიფინგზე განაცხადა, რომ "მოქალაქეთა პოლიტიკური გაერთიანებების შესახებ" ორგანულ კანონში პოლიტიკური პარტიის წევრობის შეზღუდვასთან დაკავშირებული ცვლილებები ხორციელდება: პირს, რომელიც დასაქმებულია ორგანიზაციაში, რომლის შემოსავლის 20%-ზე მეტი წლის განმავლობაში მიღებულია უცხოური ძალისგან, პოლიტიკური პარტიის წევრობა 8 წლის ეკრძალება.

გამოხმაურებები გრანტების შესახებ კანონში ცვლილებაზე: