"სოციალური სამართლიანობის ცენტრი" (SJC) ოკუპირებული ცხინვალის რეჟიმის მიერ თამარ მეარაყიშვილის გამოძევებაზე ანგარიშს აქვეყნებს და მიიჩნევს, რომ ამ გადაწყვეტილებით უხეშად დაირღვა არა მხოლოდ ქართველი აქტივისტი ქალის ფუნდამენტური უფლებები, არამედ საფრთხის ქვეშ დადგა ცხინვალის რეგიონში მცხოვრები ეთნიკური ქართველების სამართლებრივი სტატუსი.

"თამარ მეარაყიშვილი 2025 წლის 22 დეკემბერს საკუთარ სახლში, ძალის დემონსტრაციული გამოყენებით დააკავეს ჯაშუშობის მძიმე ბრალდებით, რაც 10-დან 20 წლამდე პატიმრობას ითვალისწინებდა. დაკავება განხორციელდა მასშტაბური სპეცოპერაციით, ბრალის შინაარსი კი მას მხოლოდ დაკავების შემდეგ გააცნეს. პატიმრობაში ყოფნისას იგი შიმშილობდა, განიცდიდა მუქარას და ეთნიკურ ნიშნით სიძულვილს.

მიუხედავად მიმდინარე სისხლის სამართლის დევნისა, 31 დეკემბერს de facto სასამართლომ მოულოდნელად მიიღო გადაწყვეტილება თამარ მეარაყიშვილის დაჯარიმებისა და ცხინვალის რეგიონიდან გამოძევების შესახებ, თითქოსდა "უკანონო მოქალაქეობის" საფუძვლით. ეს გადაწყვეტილება მიღებულ იქნა კანონით დადგენილი აუცილებელი პროცედურების სრული უგულებელყოფით, რაც მიუთითებს პროცესის პოლიტიკურ მოტივაციას და აქტივისტის გაჩუმების მიზანს.

თამარ მეარაყიშვილი წლების განმავლობაში იყო ერთ-ერთი იშვიათი კრიტიკული ხმა რეგიონში, რომელიც იცავდა როგორც ეთნიკურად ქართველების, ისე ოსი თემის უფლებებს და ამხელდა კორუფციასა და სისტემურ პრობლემებს. მისი დევნა, დაპატიმრება და გამოძევება წარმოადგენს არა ერთჯერად შემთხვევას, არამედ გაგრძელებულ რეპრესიას სამოქალაქო აქტივიზმის წინააღმდეგ.

აქტივისტის გამოძევება ქმნის სახიფათო პრეცედენტს ცხინვალის რეგიონში მცხოვრები ეთნიკური ქართველებისთვის და გზავნილია, რომ საქართველოს მოქალაქეობის შენარჩუნება შეიძლება გახდეს მათი რეგიონიდან გაძევების საფუძველი. ამ ფონზე განსაკუთრებით საგანგაშოა საქართველოს ხელისუფლების უმოქმედობა და ის განცხადებები, რომლებიც პრაქტიკულად ამართლებენ ამ გადაწყვეტილებას. სოციალური სამართლიანობის ცენტრი განაგრძობს თამარ მეარაყიშვილის მხარდაჭერას და მისი უფლებების დაცვას," — ვკითხულობთ განცახდებაში.