ექიმი, ნარკოლოგი, პარტია ფედერალისტების წევრი ზურა სიხარულიძე სოციალურ ქსელში ოცნების ხელისუფლების ჯანდაცვის სამინისტროში გამართლ სხდომაზე გაკეთებულ განცხადებას გამოეხმაურა იმის შესახებ, რომ ფსიქოტროპული მედიკამენტების დანიშვნაზე კონტროლი უნდა გამკაცრდეს.

მისი განმარტებით, "სააფთიაქო ნარკომანია" საქართველოში აქამდეც არსებობს და მსგავსი აკრძალვა შედეგს არ გამოიღებს. მისივე თქმით, ეს ნაბიჯი ხელს შეუწყობს "შავი ბაზრის სტიმულირებას, სადაც უფრო უხარისხო, უფრო ტოქსიკური ნივთიერებები შემოვა".

"ო, საოცრება — თურმე საქართველოში "სააფთიაქო ნარკომანია" არსებობს, დღეს გაიგეს და უნდა გაამკაცრონ. ექიმები უნდა დასაჯონო. და ვინც ამ პრეპარატებს მოიხმარს — იმ ხალხს რას უშვებით? არ გაინტერესებთ?

ვინც უკვე წლებია დამოკიდებულია ამ პრეპარატებზე, ვინც შავ ბაზარზე ყიდულობს ან "თეთრზე" გადადის — მათთან რა ხდება? საოცრებაა პირდაპირ. ვკრძალავთ და რას ვიღებთ შედეგად? შავი ბაზრის სტიმულირებას, სადაც უფრო უხარისხო, უფრო ტოქსიკური ნივთიერებები შემოვა. ნეტა ვის ევალებოდა სააფთიაქო ქსელში კონტროლი? იმპორტზე კონტროლი?

საცალო რეალიზაციის შემოწმება? რა საინტერესოა — 13 წელი თითქოს გვეძინა ??
საერთო კომისიაც ხომ არსებობდა შსს-სთან ერთად კვოტების დასადგენად? ნეტა ვინ იყვნენ ის ჩინოვნიკები? აღარ არიან? თუ არიან და ახლა გაიღვიძეს 13-წლიანი ძილის შემდეგ?
მაგრამ მთავარი კითხვა ესაა:

ვინც არასამედიცინო მიზნით მოიხმარს ამ პრეპარატებს — იმ ხალხს რას ვთავაზობთ? რა სერვისი არსებობს? არის რამე პროტოკოლი, გაიდი, ოფიციალური დოკუმენტი?
სადმე გამოქვეყნებულია? ლინკი ჩამიგდეთ, თუ არსებობს — მე ვერ ვპოულობ", — წერს ზურა სიხარულიძე.

ცნობისთვის, ჯანდაცვის სამინისტრომ გაავრცელა ინფორმაცია იმის შესახებ, რომ ფსიქოტროპული მედიკამენტების დანიშვნისთვის კონტროლის გამკაცრების აუცილებლობაზე იმსჯელეს.

მათივე განმარტებით, "ჯანდაცვის სამინისტრომ ფსიქოტროპული მედიკამენტების გაცემის პრაქტიკა შეისწავლა, სადაც მნიშვნელოვანი ნაკლოვანებები და რისკები გამოვლინდა" და პაციენტების უსაფრთხოებისა და მედიკამენტების არაკეთილსინდისიერად გაცემის რისკების მინიმუმამდე დაყვანის მიზნით, შესაბამის ნორმატიულ აქტებში ცვლილება იგეგმება.

"ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მიხეილ სარჯველაძის ხელმძღვანელობით, პროფესიული განვითარების საბჭოს სხდომა გაიმართა, სადაც ფსიქოტროპული მედიკამენტების დანიშვნისთვის კონტროლის გამკაცრების აუცილებლობაზე იმსჯელეს.

ჯანდაცვის სამინისტრომ ფსიქოტროპული მედიკამენტების გაცემის პრაქტიკა შეისწავლა, სადაც მნიშვნელოვანი ნაკლოვანებები და რისკები გამოვლინდა. საბჭოს სხდომაზე აღინიშნა, რომ ექიმების მიერ, ფსიქოტროპული მედიკამენტების რეცეპტების გაცემა ხდებოდა დასაბუთების, დიაგნოსტირებისა და პაციენტთან კონსულტაციის გარეშე. ცალკეულ შემთხვევებში, ფსიქოტროპული მედიკამენტების რეცეპტს გასცემდა ექიმი, რომელსაც შესაბამისი ნებართვა არ ჰქონდა. ასევე, მედიკამენტი გაიცემოდა, დღიურ დოზასთან შედარებით, ორჯერ და სამჯერ დიდი დოზით.

საბჭოს წევრების განცხადებით, ფსიქოტროპული მედიკამენტების გაცემის მანკიერი პრაქტიკის აღმოფხვრის პროცესში, სახელმწიფოსთან ერთად, მნიშვნელოვანია ექიმების როლი და პასუხისმგებლობა.

ჯანდაცვის მინისტრის განმარტებით, შესწავლისა და ანალიზის შედეგად გამოვლენილი ფაქტები სცილდება სამართლებრივ ნორმებს, რასაც შესაბამისი რეაგირება მოჰყვება. იგეგმება ცვლილებები შესაბამის ნორმატიულ აქტებში, რათა მედიკამენტების არაკეთილსინდისიერად გაცემის რისკები მინიმუმამდე შემცირდეს და პაციენტების უსაფრთხოება მაქსიმალურად იყოს უზრუნველყოფილი. კონკრეტული საქმეები, შესწავლის მიზნით, საგამოძიებო უწყებებს გადაეცემა, საბჭო კი ექიმების პროფესიული პასუხისმგებლობის საკითხზე მსჯელობას გააგრძელებს.

პროფესიული განვითარების საბჭოს შემადგენლობაში შედიან: ჯანდაცვის სამინისტროსა და მისი დაქვემდებარებული უწყებების, სამედიცინო დაწესებულებებისა და დარგობრივი ასოციაციების წარმომადგენლები. ასევე — პარლამენტის ჯანმრთელობის დაცვისა და სოციალურ საკითხთა კომიტეტის წევრები. საბჭო გადაწყვეტილებას ხმათა უმრავლესობით იღებს", — წერია სამინისტროს მიერ გავრცელებულ ინფორმაციაში.