"ჩვენ მივიღეთ საჩივარი და მას დადგენილი პროცედურის შესაბამისად ვუპასუხებთ, — ამის შესახებ BBC-ის სპიკერმა "რადიო თავისუფლებას" განუცხადა. BBC-ის გზავნილში ასევე ნათქვამია, რომ ჟურნალისტურ ნამუშევარს აქვს მათი მხარდაჭერა და მადლობას უხდიან მამაც ადამიანებს, რომლებმაც მონაწილეობა მიიღეს მასში.

"ჩვენ მივიღეთ საჩივარი და მას დადგენილი პროცედურის შესაბამისად ვუპასუხებთ. ჟურნალისტურ ნამუშევარს აქვს ჩვენი მხარდაჭერა და მადლობას ვუხდით მამაც ადამიანებს, რომლებმაც მონაწილეობა მიიღეს მასში," — განუცხადა BBC-ის სპიკერმა "რადიო თავისუფლებას".

• "ქართულმა ოცნებამ" ოფიციალური საჩივრით მიმართა BBC-ის და ფილმის აღება და "საჯარო და მკაფიო ბოდიში" მოსთხოვა

15 იანვარს, ოცნების პარლამენტის თავმჯდომარემ, შალვა პაპუაშვილმა ბრიფინგზე თქვა, რომ პარტია ქართული ოცნება — დემოკრატიულმა საქართველომ 14 იანვარს ოფიციალური საჩივრით მიმართა BBC-ის საქართველოში პროტესტის მონაწილეების წინააღმდეგ, სავარაუდოდ, ქიმიური იარაღის გამოყენებასთან დაკავშირებული ფილმის საქმეზე.

"პარტია ქართული ოცნება დემოკრატიული საქართველოს სახელით გუშინ ოფიციალური საჩივრით მოვმართეთ BBC-ის. რაც შეეხება საჩივრის დასაბუთებას და ჩვენს მოთხოვნას: აღნიშნული ფილმი და თანმხლები პუბლიკაციები შეიცავს სერიოზულ და დაუდასტურებელ ბრალდებებს რომლებიც არღვევს თავად BBC-ის სარედაქციო სტანდარტებს, დიდი ბრიტანეთის კომუნიკაციების მარეგულირებელი ბიუროს მაუწყებლობის კოდექსს და პასუხისმგებლიანი ჟურნალისტიკის ფუნდამენტურ პრინციპებს.

საქმე გვაქვს სიზუსტის ვალდებულების უხეშ დარღვევასთან, BBC-მ მის პუბლიკაციაში ფაქტად წარმოადგინა მტკიცება, რომ თითქოს საქართველოს სამართალდამცავმა ორგანოებმა საპროტესტო აქციების დროს გამოიყენეს ქიმიური ნივთიერება კამიტი. ეს მტკიცება არ ეფუძნება არცერთ გადამოწმებულ დამოუკიდებელ ან სანდო წყაროს. პირიქით, ჩატარებული გამოძიებით დადასტურდა, რომ აღნიშნული ნივთიერება შსს-ს არათუ არასდროს გამოუყენებია, ის მას მფლობელობაშიც არასდროს ჰქონია.

BBC თავის პუბლიკაციებში, ასევე მცდარად წარმოაჩენს, ფაქტებს ისე, თითქოს შეკრების მონაწილეები სამართალდამცავი ორგანოების წარმომადგენლების მიმართ ძალადობრივ ქმედებებს არ ახორციელებდნენ და მიუხედავად ამისა, სამართალდამცავმა ორგანოებმა მაინც დაშალეს შეკრებები.

გარდა ამისა, BBC ცრუდ და სანდო მტკიცებულებების გარეშე ამტკიცებს, თითქოს ქართული ოცნების საპატიო თავმჯდომარე ბიძინა ივანიშვილი მონაწილეობდა 2024 წლის ნოემბერ-დეკემბერში გამართული ძალადობრივი შეკრებების დაშლასთან დაკავშირებული გადაწყვეტილებების მიღების პროცესში", — თქვა შალვა პაპუაშვილმა.

მისი თქმით, ქართული ოცნება BBC-ს სთხოვს, აიღოს ფილმი და მასთან დაკავშირებული მასალების შესაბამისი პლატფორმებიდან და BBC-იმ "საჯაროდ და მკაფიოდ მოიხადოს ბოდიში.

"ჩვენი საჩივრით მოთხოვნილი გვაქვს ფილმისა და მასთან დაკავშირებული მასალების აღება შესაბამისი პლატფორმებიდან. BBC-ის მხრიდან საჯარო და მკაფიო ბოდიშის მოხდა ფაქტობრივი საფუძვლების გარეშე ვარაუდისა და მტკიცებისთვის, თითქოს საქართველოს სამართალდამცავმა ორგანოებმა გამოიყენეს "კამიტი". ფაქტობრივი საფუძვლის გარეშე ინფორმაციის გავრცელებისთვის, თითქოს საქართველოს სამართალდამცავმა ორგანოებმა ფიზიკური ძალა გამოიყენეს იმ პირობებში, როდესაც შეკრებების მონაწილეები მათზე თავდასხმას არ ახორციელებდნენ", — თქვა პაპუაშვილმა.

პაპუაშვილის განმარტებით, ბრიტანეთის კანონმდებლობა ითვალისწინებს, რომ საჩივრით ჯერ მედიას უნდა მიმართონ, თუ მედია არ გამოასწორებს დარღვევას, შემდეგი ეტაპი ბრიტანეთის კომუნიკაციების ბიუროსადმი მიმართვაა. თუ კიდევ არ აღმოიფხვრა დარღვევა, ბრიტანეთის სასამართლოს მიმართავენ.

"დიდი ბრიტანეთის კანონმდებლობის შესაბამისად, დაწესებულია გასაჩივრების თანმიმდევრობა, რომლის მიხედვითაც, დაზარალებულმა ჯერ უნდა მიმართოს თავად მედიას, რაც ჩვენ ჩვენი გუშინდელი საჩივრით გავაკეთეთ. თუ BBC არ გამოასწორებს დარღვევას, შემდეგი ეტაპი არის ბრიტანეთის კომუნიკაციების ბიუროსადმი მიმართვა. თუ იქაც არ აღმოიფხვრა დარღვევა, ამის შემდეგ გვექნება შესაძლებლობა მივმართოთ დიდი ბრიტანეთის სასამართლოს. საქართველოს წინააღმდეგ ამ საძაგელი კამპანიის მხილებისთვის ჩვენ ყველა სამართლებრივ საშუალებას გამოვიყენებთ, მათ შორის ადამიანის უფლებათა ევროპული სასამართლოსადმი მიმართვის უფლებას", — განაცხადა პაპუაშვილმა.