როგორც კი 31 დეკემბერს საათი 12-ს ჩამოკრავს და სუფრას მივუსხდებით, სადღეგრძელოების პარალელურად, ზოგიერთი ჩვენგანი, მომავალი წლის გეგმებს აქტიურად ადგენს — მაგალითად, როგორ დაიწყებს სპორტდარბაზში სიარულს, მიირთმევს ჯანსაღ საკვებს, ყოველდღე დალევს ორ ლიტრ წყალს, იმოგზაურებს, საკუთარ თავს მეტ დროს დაუთმობს და ა.შ

თავდაპირველად, ეს მოტივაცია იმედისმომცემია, თუმცა წლიდან წლამდე ჩვენი ჩაფიქრებული გეგმები ნელ-ნელა გვავიწყდება. Forbes Health-ის კვლევა გვაჩვენებს, რომ გეგმების სისრულეში მოყვანის პერიოდი ორიდან ოთხ თვემდე გრძელდება, ხოლო მათი 90% უგულებელყოფილია.

და, რატომ ხდება ასე?

ბევრი ადამიანი გულწრფელად და კარგი განზრახვით ადგენს გეგმებს, თუმცა, სამწუხაროდ, მალევე ივიწყებს. ვინაიდან, ის გეგმები, რომლებსაც ვადგენთ რთულად შესასრულებელია, რაც ხელს უშლის მის გრძელვადიან წარმატებას, განსაკუთრებით მაშინ, როდესაც საქმე ჯანსაღი ცხოვრების წესსა და ჯანმრთელობას ეხება.

ჯანმრთელობასთან დაკავშირებული გეგმების წარუმატებლობის ერთ-ერთი მთავარი მიზეზი ის არის, რომ მიზნები ხშირად ზედმეტად ამბიციურია. "3 იანვრიდან დიეტას დავიწყებ" ან "ყოველდღე სპორტდარბაზში ვივლი" შეიძლება მოტივაციურად ჟღერდეს, მაგრამ ადამიანები არ არიან მიდრეკილები მსგავსი უკიდურესი ცვლილებებისკენ.

მაშ, ახალ წელს მომავალი წლის გეგმები აღარ დავგეგმო?

სწორი პასუხია — კი, თუმცა რეალისტური.

ფოტო: Freepik

გრძელვადიანი პროგრესი უფრო სავარაუდოა, როდესაც მიზნები დაყოფილია მცირე, მართვად ქმედებებად — მაგალითად, საკვებში ეტაპობრივად ბოსტნეულის დამატება, ყოველდღიური სეირნობა ან მარტივი ვარჯიშები. დროთა განმავლობაში, ეს მცირე ცვლილებები მნიშვნელოვან შედეგებამდე მიგვიყვანს.

ექსპერტები გვირჩევენ, რომ ახალი წლის ეს პერიოდი თვითრეფლექსიისთვის გამოვიყენოთ. იმის გახსენება, რა გამოვიდა, რა არა და რა არის ნამდვილად მნიშვნელოვანი — გაცილებით ეფექტიანი შეიძლება იყოს, ვიდრე მკვეთრი ცვლილებების დაგეგმვა ერთ ღამეში. ჯანსაღი ცხოვრების წესი ჩამოყალიბებულია მცირე, მდგრადი ჩვევებით, რომლებიც ყოველდღიურ რუტინასა და პირად საჭიროებებთან შესაბამისობაშია.

ამიტომ, თუ გსურთ თქვენი დასახული გეგმებიდან დაახლოებით 90% მაინც შეასრულოთ, გახსოვდეთ, იყოთ რეალისტურები, რათა, წლის მიწურულს, თავიდან აიცილოთ იმედგაცრუება.