რუსთავის მე-12 სასჯელაღსრულების დაწესებულებაში მყოფი ყოფილი პრემიერმინისტრი, ირაკლი ღარიბაშვილი მისმა უფლებადამცველმა, ამირან გიგუაშვილმა მოინახულა.

ადვოკატის განცხადებით, ღარიბაშვილი ახლა ციხეში შესახლების შემდგომი პროცედურების გავლას ელოდება. მისივე თქმით, ღარიბაშვილი მხნედ არის და იგივე მდგომარეობაშია, რაშიც ნებისმიერი სხვა პირი სასჯელაღსრულების დაწესებულებაში.

მისივე თქმით, საპროცესო შეთანხმება ღარიბაშვილმა თავად მოითხოვა. მისივე განმარტებით,"თუკი ბრალდებულისთვის ცხადია, რომ ის საპატიმრო სასჯელს მოიხდის, ლოგიკაც არის იმაში, რომ რაც ადრე შევა საპატიმრო დაწესებულებაში და ადრე დაიწყებს სასჯელის მოხდას, ადრე დატოვებს მას."

"ირაკლი ღარიბაშვილი არის მხნედ და იმყოფება იგივე მდგომარეობაში, რაშიც ნებისმიერი სხვა პირი სასჯელაღსრულების დაწესებულებაში. ჩვენ ვისაუბრეთ მიმდინარე საკითხებზე, რაიმე კონკრეტული გზავნილი ან მესიჯი მას, მით უფრო, საზოგადოებისთვის გადასაცემად ნამდვილად არ დაუბარებია...

ველოდებით იმ პროცედურების გავლას, რა პროცედურებიც მსგავსი ტიპის პატიმარს ახასიათებს, ვგულისხმობთ შესაბამისი პირველადი საკითხების გადაწყვეტას, დამოკიდებულება მის მიმართ არის ნორმალური...

როდესაც მოხდა პოზიციების შეჯერება ბრალდების მხარესთან, მაშინ გაფორმდა საპროცესო შეთანხმება ეს დადგენილი წესია და ბევრ სხვა საქმეში მსგავსი პრაქტიკა არსებობს, მიმდინარეობს გარკვეული მოლაპარაკება მხარეებს შორის, შედგება შეთანხმება და შესაბამისად, თუკი ბრალდებულისთვის ცხადია, რომ ის საპატიმრო სასჯელს მოიხდის, ლოგიკაც არის იმაში, რომ რაც ადრე შევა საპატიმრო დაწესებულებაში და ადრე დაიწყებს სასჯელის მოხდას, ადრე დატოვებს მას", — განაცხადა ამირან გიგუაშვილმა.

შეგახსენებთ, 2-გზის ყოფილი პრემიერმინისტრი, თავდაცვისა და შინაგან საქმეთა მინისტრი ირაკლი ღარიბაშვილი 12 იანვარს დააკავეს. პროკურატურის ინფორმაციით, უწყებამ ღარიბაშვილთან საპროცესო შეთანხმება გააფორმა და მას სასჯელის ზომად 5 წლით თავისუფლების აღკვეთა მიესაჯა.