ჩინეთი დონალდ ტრამპმის მიერ ირანთან საქმიანი ურთიერთობების მქონე ქვეყნების წინააღმდეგ ტარიფების დაწესებას გამოეხმაურა. მათი თქმით, ჩინეთი "ყველა საჭირო ზომას მიიღებს თავისი კანონიერი უფლებებისა და ინტერესების დასაცავად". ამის შესახებ ინფორმაციას BBC-ავრცელებს.

"ჩინეთის პოზიცია ტარიფების განურჩეველი დაწესების წინააღმდეგ თანმიმდევრული და ნათელია... ტარიფებსა და სავაჭრო ომებს გამარჯვებულები არ ჰყავთ და იძულება და ზეწოლა პრობლემებს ვერ გადაჭრის. პროტექციონიზმი ყველა მხარის ინტერესებს აზიანებს", — წერს X-ზე ვაშინგტონში ჩინეთის საელჩოს წარმომადგენელი.

ცნობისთვის, აშშ-ის პრეზიდენტი დონალდ ტრამპი იმ ქვეყნებს, რომლებიც ირანთან ბიზნესს აწარმოებენ, ახალ 25%-იან ტარიფს უწესებს. ეს განცხადება შეიძლება ნიშნავდეს იმას, რომ ჩინეთიდან შემოტანილი საქონელი აშშ-ში იმპორტისას მნიშვნელოვნად გაძვირდება.

"ძალაშია დაუყოვნებლივ, რომ ნებისმიერი ქვეყანა, რომელიც ბიზნესს აწარმოებს ირანის ისლამურ რესპუბლიკასთან, 25%-იან ტარიფს გადაიხდის ნებისმიერ და ყველა სახის ბიზნესზე, რომელსაც აშშ-სთან აწარმოებს. ეს ბრძანება საბოლოოა", — დაწერა დონალდ ტრამპმა Truth Social-ზე.

შეგახსენებთ, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.

აშშ-ში დაფუძნებული ადამიანის უფლებათა დამცველი ორგანიზაცია HRANA-ს მონაცემებით, ირანში მიმდინარე არეულობის დროს 500-ზე მეტი ადამიანი დაიღუპა და 10 600-ზე მეტი დააკავეს.