დღეს "ტვ პირველმა" გორის პოლიციის განყოფილებასთან გადაღებული კადრები გაავრცელა, სადაც მათი თქმით, სავარაუდოდ, ჩანს 20 წლის ლუკა თოფჩიშვილის ცემის შედეგად დარჩენილი სისხლის კვალის წმენდა.

მოგვიანებით, შინაგან საქმეთა სამინისტრომ განცხადება გამოაქვეყნა, სადაც უწყება წერს, რომ აღნიშნული დეზინფორმაციის გავრცელება "პოლიციელის მიზანმიმართულ დისკრედიტაციას ემსახურება".

უწყების ინფორმაციით, 3 იანვარს შიდა ქართლის პოლიციის დეპარტამენტის გორის რაიონული სამმართველოს თანამშრომლებმა 2000 წელს დაბადებული არაფხიზელ მდგომარეობაში მყოფი პირი დააკავა. შსს-ს განცხადებაში ვკითხულობთ, რომ დაკავების პროცესში, შემთხვევის ადგილზე, მისმა თანმხლებმა პირმა, 2005 წელს დაბადებულმა, ნასამართლევმა და პირობითი მსჯავრის ქვეშ მყოფმა ლუკა თოფჩიშვილმა პოლიციელებს ფიზიკური შეურაცხყოფა მიაყენა და ადგილიდან მიმალვა სცადა.

"მიმდინარე წლის 3 იანვარს, შინაგან საქმეთა სამინისტროს შიდა ქართლის პოლიციის დეპარტამენტის გორის რაიონული სამმართველოს თანამშრომლებმა, არაფხიზელ მდგომარეობაში მყოფი მოქალაქე, 2000 წელს დაბადებული პირი, რომელიც აგრესიულად იქცეოდა და დააზიანა მოქალაქის ავტომობილი, ადმინისტრაციული წესით დააკავეს.

დაკავების პროცესში, შემთხვევის ადგილზე, მისმა თანმხლებმა პირმა, 2005 წელს დაბადებულმა, ნასამართლევმა და პირობითი მსჯავრის ქვეშ მყოფმა ლუკა თოფჩიშვილმა სამსახურებრივი მოვალეობის შესრულებაში სამართალდამცველებს ხელი შეუშალა და პოლიციელებს ფიზიკური შეურაცხყოფა მიაყენა. კერძოდ, სახეში დაარტყა მუშტი პოლიციელს, რის შემდეგაც დააპირა მიმალვა და სცადა მეორე პოლიციელის ცემა, რომელიც მას დაედევნა. თუმცა, სამართალდამცველებმა ის სამსახურებრივი მოვალეობის შესრულების დროს, სამართალდამცველის მიმართ ძალადობით განხორციელებული წინააღმდეგობის ფაქტზე, სისხლის სამართლის კოდექსის 353-ე მუხლით დააკავეს," — წერს უწყება.

ფოტო: ტვ პირველი

ტვ პირველის ინფორმაციით, ინციდენტის შემდეგ 20 წლის ლუკა თოფჩიშვილს სამედიცინო დახმარება დასჭირდა. ოჯახის წევრებმა მედიასთან საუბრისას განაცხადეს, რომ ახალგაზრდამ პოლიციასთან ფიზიკური ანგარიშსწორების დროს ყბის დაზიანება მიიღო, ტვინის შერყევა აქვს და ოპერაცია ჩაუტარდა. თოფჩიშვილის ადვოკატის თქმით, ახალგაზრდას დაკავებისას ჩაუსაფრდნენ და მას 15-მდე პოლიციელი ფიზიკურად გაუსწორდა.