4 ოქტომბრის საქმეზე დაკავებული 14 პირი მოსამართლე ვალერიან ბუგიანიშვილმა პატიმრობაში დატოვა. მსჯავრდადებულების სკამზე ისხდნენ — ვლადიმერ გველესიანი, ზურაბ ჭავჭანიძე, სერგო მეგრელიშვილი, გიორგი რურუა, ამირან დოლიშვილი, ანტონ ვარდანიძე, გიორგი ქორქია, ალექსანდრე ჩილაჩავა, გენადი კუპრეიშვილი, ლაშა ივანაძე, ლევან ჯიქია, სულხან ტუღუში, ხვიჩა გოგოხია და რამაზ მუმლაძე.

დღევანდელ სასამართლო პროცესზე მხარეებმა მტკიცებულებების დასაშვებობაზე და აღმკვეთი ღონისძიების შეცვლაზე იმსჯელეს. პროკურორი ლაშა ცქვიტარიას მტკიცებით, აღმკვეთი ღონისძიება, წინასწარი პატიმრობა ძალაში უნდა დარჩენილიყო, რადგან კვლავ არსებობს საშიშროება ბრალდებულის მიერ საქმეში არსებული სამხილების განადგურების ან მიმალვის.

დაცვის მხარის ნაწილი აღმკვეთი ღონისძიების გაუქმებას და მათი დაცვის ქვეშ მყოფების გათავისუფლებას ითხოვდა, ნაწილი — აღმკვეთის სახით გირაოს გამოყენებას.

შეგახსენებთ, ვლადიმერ გველესიანს, ზურაბ ჭავჭანიძეს, სერგო მეგრელიშვილს, გიორგი რურუას, ამირან დოლიშვილს, ანტონ ვარდანიძეს, გიორგი ქორქიას, ალექსანდრე ჩილაჩავას, გენადი კუპრეიშვილს, ლაშა ივანაძეს, ლევან ჯიქიას, სულხან ტუღუშს, ხვიჩა გოგოხიასა და რამაზ მუმლაძეს საქართველოს სისხლის სამართლის კოდექსის 19-222-ე მუხლის მე-2 ნაწილის "ა" ქვეპუნქტი ედებათ ბრალად, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ასევე ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.

ცნობისთვის, გუშინ სასამართლომ 4 ოქტომბრის საქმეზე დაკავებული 10 პირი კვლავ პატიმრობაში დატოვა. 10-პირიან საქმეში გაერთიანებული იყვნენ: პაატა ბურჭულაძე, მურთაზ ზოდელავა და ირაკლი ნადირაძე, რომელთაც ბრალდება საქართველოს სისხლის სამართლის კოდექსის 19-222-ე და 317-ე მუხლით აქვთ წარდგენილი, რაც საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ მოწოდებას და ჯგუფური ძალადობის ორგანიზებასა და ხელმძღვანელობას გულისხმობს.