ლუკა ძაძამიამ საკრებულოს დატოვების შემდეგ მედიასთან პირველი კომენტარი გააკეთა. 21 წლის ძაძამიას განცხადებით, მან ეს გადაწყვეტილება დამოუკიდებლად მიიღო და მას წარსულში პროევროპულ აქციებში მონაწილეობისთვის ქართული ოცნების მხრიდან ზეწოლას ადგილი არ ჰქონია. შემდეგ ძაძამიამ დასძინა, რომ ის რჩება ქართული ოცნების მხარდამჭერების რიგებში და თავისი პირადი რესურსებით გააგრძელებს პარტიის "ღირებულებების დაცვას და მათი კეთილდღეობის უზრუნველყოფას".

"მივიღე გადაწყვეტილება თბილისის საკრებულოს მანდატის დატოვების შესახებ. ჩემი სწრაფვა და მიზანი ყოველთვის იყო საზოგადოებრივი ინტერესების დაცვა, გატარება. ამ მიზნის მიღწევისთვის მივიღე აღნიშნული გადაწყვეტილება. მოგეხსენებათ, ამ პერიოდის განმავლობაში ვიყავი არაერთი თავდასხმის ადრესატი. მე საქმიანობას გავაგრძელებ ახალი სტატუსით. ჩემი პირადი რესურსით უზრუნველვყოფ ხსენებული მიზნების მიღწევას, რაც გამოიხატება ჩვენს თანამოქალაქეებზე, თანამემამულეებზე ზრუნვასა და მათი უკეთესი მომავლის უზრუნველყოფაში. ჩემს სამომავლო გეგმებთან დაკავშირებით დეტალურ ინფორმაციას მიიღებთ. მიუხედავად იმისა, რომ ადრეულ ასაკში ავიღე პასუხისმგებლობა საკუთარ თავზე, რასაც შემდგომ რადიკალური ჯგუფებისგან მოყვა ჩემზე და ჩემს ძვირფას ადამიანებზე პიროვნული თავდასხმები, მათი დისკრედიტაციის მცდელობები, ჩემი შეხედულებები და პოზიცია არ შეცვლილა. ვრჩები ჩემი გუნდისა და სამშობლოს ერთგული, ჩემი პირადი რესურსით ვეცდები ამ ღირებულებების დაცვისა და მათი კეთილდღეობის უზრუნველყოფისთვის ყველა საჭირო ღონისძიება განვახორციელო.

რაც შეეხება ჩემს სამომავლო გეგმებს, ჩემი მიზანი როგორც იყო, ასევე დარჩება სწრაფვა საზოგადოებრივი კეთილდღეობისთვის. [ქართული ოცნების] მხრიდან არანაირ მინიშნებას არ ჰქონდა ადგილი," — თქვა ძაძამიამ. (ტექსტი IPN)

ძაძამიას განცხადებით, აქციის კადრები, რომელიც სოციალურ ქსელში გავრცელდა რუსული კანონის საპროტესტო აქციიდან არის და არა 2024 წლის პროევროპული აქციიდან. მისი მტკიცებით, 2024 წლის ნოემბერს ის ესპანეთში იმყოფებოდა. შემდეგ ძაძამიამ დასძინა, რომ "ჩანერგილი რუსთაველის გამზირზე არავინ ყოფილა".

"ბულინგის მცდელობები იყო. მე არ ვიტყვი, რომ ბულინგის მსხვერპლი აღმოვჩნდი, თუმცა ცალსახად იყო ბულინგის მცდელობები. ჩანერგილი რუსთაველის გამზირზე არავინ ყოფილა. უსაფუძვლო ბრალდებაა, თავად "ჩანერგილი" ტერმინი არის შეურაცხმყოფელი. მიმაჩნია, რომ პატრიოტული სულისკვეთების ადამიანი ვარ, იგივე შეხედულების ადამიანად დავრჩი. ქართული ოცნების გუნდში ვიყავი და ქართული ოცნების გუნდიდან წამოსვლაზე არავინ საუბრობს.

რაც შეეხება აქციაზე ჩემი ყოფნის კადრებს, 2024 წელს ნოემბრის აქციის მიმდინარეობის დროს ვიყავი ესპანეთში. იქამდე რამდენიმე თვე და შემდგომ რამდენიმე თვე ესპანეთი არ დამიტოვებია. აღნიშნული კადრი 2024 წლის არაა, ის არის 2022 წლის ბოლოსა და 2023 დასაწყისს შორის არსებული პერიოდი," — განაცხადა ლუკა ძაძამიამ.

ჟურნალისტების კითხვაზე, ვიხილავთ, თუ არა მას კვლავ რუსთაველის გამზირზე ძაძამიამ უპასუხა, რომ "[რუსთაველის გამზირზე] შეცდომაში შეყვანილი ადამიანები ან სამშობლოს მოღალატეები დგანან, რომლები გარე დაფინანსებების ხარჯზე იხარებენ გულს".