თბილისის მერი კახა კალაძე ქართული ოცნების საკანონმდებლო ინიციატივას გამოეხმაურა იმის შესახებ, რომ ემიგრანტებს უცხოეთში არჩევნებში ხმის მიცემა აეკრძალებათ.

კალაძე ტყუილს უწოდებს ინფორმაციას იმის შესახებ, რომ ემიგრანტებს არ ექნებათ ხმის მიცემის შესაძლებლობა. მისი თქმით, "ყველა მოქალაქეს ექნება ხმის მიცემის შესაძლებლობა, თუმცა — საქართველოში".

"ტყუილია ინფორმაცია, რომ ემიგრანტებს არ ექნებათ შესაძლებლობა, ხმა მისცენ. ეს არასწორი ინფორმაციაა. მიზანმიმართულად ხდება არასწორი ინფორმაციის გავრცელება. რა თქმა უნდა, საქართველოს ყველა მოქალაქეს ექნება ხმის მიცემის შესაძლებლობა, თუმცა ექნებათ საქართველოში. ხმის მიცემის აკრძალვა არ ხდება. იმის გათვალისწინებით, რომ თუნდაც ჩვენს ქვეყანაში ხდება გარე ჩარევები, მათ შორის, ამერიკის შეერთებული შტატებიც საუბრობდა ამ მიმართულებით არსებულ უდიდეს პრობლემაზე, აღნიშნული გადაწყვეტილების მიღება, ქვეყნის ინტერესებიდან გამომდინარე, მნიშვნელოვანია. ანალოგიური დამოკიდებულება აქვს სხვადასხვა ქვეყანას. მაგალითად შეგვიძლია მოვიყვანოთ ირლანდია, ისრაელი, სომხეთი. არაფერი განსაკუთრებული არ ხდება. თუ მოქალაქეებს ექნებათ სურვილი, მიიღონ არჩევნებში მონაწილეობა, ჩამოვლენ საქართველოში და მისცემენ ხმას", — თქვა კახა კალაძემ.

ქართული ოცნება საარჩევნო კოდექსში ცვლილებებს გეგმავს, რომლის მიხედვითაც საზღვარგარეთ მყოფი მოქალაქეები არჩევნებში მონაწილეობას ვერ შეძლებენ, 4 წელიწადში ერთხელ, სამშობლოში თუ არ ჩამოვლენ ხმის მისაცემად, — ამის შესახებ ოცნების პარლამენტის თავმჯდომარემ, შალვა პაპუაშვილმა ბრიფინგზე განაცხადა.