სასამართლომ ჯგუფური ძალადობის საქმეზე მანჩო გიორგობიანს წინასწარი პატიმრობა შეუფარდა — გადაწყვეტილება მოსამართლე არსენ კალატოზიშვილმა მიიღო.

გიორგობიანი სასამართლო პროცესზე დაეთანხმა პროკურატურის წარდგენილ ბრალდებას. ბრალდებულის სახაზინო წესით დანიშნულმა ადვოკატმა ჟურნალისტებთან საუბრისას განაცხადა, რომ მისი დაცვის ქვეშ მყოფის ეკიპირება სასამართლოში ფსიქიატრიული დაწესებულებიდან მოხდა, სადაც მას ფსიქიატრიული ექსპერტიზა ჩაუტარდა.

"ათი წელი არ ავმდგარვარ საწოლიდან, რაც ჩემი შვილი მოკვდა და ახლა ციხის შემეშინდება?.. ყველაფერზე თანახმა ვარ, ყველაფერია კამერებზე... ყველაფერს მოვაწერე ხელი," — განაცხადა გიორგობიანმა სასამართლო პროცესზე (ტექსტი "რადიო თავისუფლება")

"რადიო თავისუფლების" ცნობით, სასამართლო პროცესის დატოვებისას, გიორგობიანმა დარბაზში დაიძახა — "გელა გელაძეს მოვაძრობ თანამდებობიდან მამუკა მდინარაძიანად, ეგენი აყირავებენ "ოცნებას", მე მაგას არ დავუშვებ".

ცნობისთვის, 4 ნოემბერს, მანჩო გიორგობიანმა სოციალურ ქსელში განცხადება გააკეთა, რომელშიც შს მინისტრს, გეკა გელაძეს ემუქრებოდა — "გეკა გელაძე ხარ თუ ვიღაცა, თავში ხო არ აგივარდა ბიჭო, აგწევთ ჰაერში მთელ შსს-ს და ჩამოგალაბორანტებ მინისტრობიდან!". გიორგობიანმა პოსტი მოგვიანებით წაშალა.

შეგახსენებთ, ქართული ოცნების მხარდამჭერს, მანჩო გიორგობიანს ბრალად ედება ჯგუფური ძალადობის ორგანიზება, რაც 9 წლამდე პატიმრობას ითვალისწინებს. პროკურატურის განცხადებით, გიორგობიანმა "სპარის" თანამშრომელს ფულის დახურდავება მოსთხოვა — უარის მიღების შემდეგ ის აგრესიული გახდა და თანამშრომლებს ფიზიკური/სიტყვიერი შეურაცხყოფა მიაყენა.

"მაღაზიიდან გასვლის შემდეგ, მანანა გიორგობიანმა ორგანიზება გაუწია ჯგუფურ მოქმედებას, რასაც თან ახლდა ძალადობა. კერძოდ, დაზარალებულების მიმართ ფიზიკური ანგარიშსწორების მიზნით, გიორგობიანმა შემთხვევის ადგილზე მიიყვანა ხუთი პირი, რომლებიც ჯგუფურად ფიზიკურად გაუსწორდნენ დაზარალებულებს და მიაყენეს დაზიანებები, რის შემდგომაც შემთხვევის ადგილიდან მიიმალნენ," — ვკითხულობთ უწყების განცხადებაში.

• POG: "გიორგობიანმა მაღაზიის თანამშრომლებს მოსთხოვა ფულადი თანხის დახურდავება, რაზეც უარის მიღების შემდეგ გახდა აგრესიული"

აღნიშნულ საქმეზე მანჩო გიორგობიანთან ერთად 5 პირი დააკავეს, ერთ-ერთი მუსიკოსი მამუკა ჩარკვიანის შვილი, ჯაკო ჩარკვიანია. უწყების განცხადებით, ჯაკო ჩარკვიანის სახლიდან უკანონოდ შენახული ცეცხლსასროლი იარაღები ამოიღეს.

"ამასთან, სამართალდამცველების მიერ ჩატარებული საგამოძიებო მოქმედებების შედეგად, ერთ-ერთი დაკავებულის ჯ.ჩ.-ს მიერ სავარაუდოდ უკანონოდ შენახული ცეცხლსასროლი იარაღები და საბრძოლო მასალა ნივთმტკიცებადაა ამოღებული. მათ შორის: 2 ავტომატური ცეცხლსასროლი იარაღი, გლუვლულიანი თოფი და სხვადასხვა ტიპის ცეცხლსასროლი იარაღისთვის განკუთვნილი 110 ვაზნა," — განაცხადა უწყებამ.

• მანჩო გიორგობიანის ჯგუფური ძალადობის საქმეზე კიდევ 4 პირი დააკავეს, მათ შორის ჯაკო ჩარკვიანი