"ერთი ასი კაცი წავიდეს პარიზში, ბერლინში, ფული ყველამ შევუგროვოთ, ცენტრალური "პროსპექტი" გადაკეტონ და რით დამთავრდება, მერე ვიხილავთ — ჯარიმებმა იმიტომ არ იმუშავა, რომ "დიფ სთეითი" აგროვებდა ფულს და აქციის მონაწილეებს ეუბნებოდა, წადი, მე გადავიხდიო," — ამის შესახებ ქართული ოცნების დეპუტატმა, თენგიზ შარმანაშვილმა განაცხადა (ტექსტი IPN).

შარმანაშვილის განცხადებით, ადმინისტრაციული დაკავებები, ჯარიმები არ აღმოჩნდა ქმედითი და "სახელმწიფო ამას გულგრილად ვეღარ შეხედავდა". ოცნების დეპუტატმა დასძინა, რომ აქციის მონაწილეების საკმარისი რაოდენობის შემთხვევაში პოლიცია მათ გზის გადაკეტვაში დაეხმარება.

"მოწოდებები, ადმინისტრაციული დაკავებები, ჯარიმები არ აღმოჩნდა ქმედითი. მაინც გრძელდება კანონის დარღვევა. რა თქმა უნდა, სახელმწიფო ამას გულგრილად ვეღარ შეხედავს და მიიღებს უფრო ქმედით ზომებს საკანონმდებლო დონეზე, რათა კანონი აღსრულდეს. ეს არ არის მიმართული კანონმორჩილი ადამიანების წინააღმდეგ. შეიკრიბება ის რაოდენობა ადამიანებისა, ვისაც შეუძლია, რუსთაველი გადაკეტოს?! გადაკეტონ, პოლიცია ამაში დაეხმარება და მოძრაობასაც მოაწესრიგებს, მაგრამ არის მცირე რაოდენობა, რომელიც ტროტუარსაც ვერ ავსებს და როცა მოესურვებათ გზას კეტავენ. მე ამასწინათ შევთავაზე ერთი ექსპერიმენტი — ერთი ასი კაცი წავიდეს საქართველოდან, ყველამ შევუგროვოთ ფული, პარიზში, ან ბერლინში, ქალაქი თავად აირჩიონ, ცენტრალური პროსპექტი გადაკეტონ და რით დამთავრდება მერე ვიხილავთ," — განაცხადა შარმანაშვილმა.

შეგახსენებთ, აქციაზე სახის ნიღბით დაფარვა — 15-დღიანი პატიმრობა; აქციაში მონაწილეობა, რომელიც შსს-ს მოთხოვნით შეწყვეტას ექვემდებარება — 60-დღიანი პატიმრობას; ამ ქმედების განმეორებით ჩადენა — 1 წლამდე პატიმრობას, მესამედ ჩადენა — 2 წლამდე პატიმრობას; პოლიციელის დაუმორჩილებლობა — 1 წლამდე პატიმრობა, განმეორებით ჩადენა — 2 წლამდე პატიმრობა, — ეს იმ საკანონმდებლო ცვლილებების არასრული ჩამონათვალია, რომელთა შეტანასაც ოცნება ადმინისტრაციულ სამართალდარღვევათა და სისხლის სამართლის კოდექსებში და "საქართველოს საკონსტიტუციო სასამართლოს შესახებ" ორგანულ კანონში გეგმავს.