ამერიკელი სენატორები ჯინ შაჰინი (დემოკრატი, ნიუ ჰემფშირი) და სენატის საგარეო ურთიერთობათა კომიტეტის თავმჯდომარე ჯიმ რიში (რესპუბლიკელი, აიდაჰო) საქართველოში 4 ოქტომბერს ჩატარებული ადგილობრივი არჩევნების შემდეგ პოლიტიკური სიტუაციის ბოლოდროინდელ განვითარებასთან დაკავშირებით განცხადებას აქვეყნებენ, სადაც აშშ-ს პრეზიდენტის, დონალდ ტრამპის ადმინისტრაციას მოუწოდებენ, "მხედველობაში ჰქონდეს საქართველოს მთავრობის ბოლოდროინდელი ქმედებები ორმხრივ ურთიერთობებში რაიმე ცვლილების განხორციელებამდე".

ისინი შეშფოთებას გამოთქვამენ საქართველოში პოლიტიკური სიტუაციის გაუარესების გამო და ირაკლი კობახიძის გადაწყვეტილებას ოპოზიციური პარტიების კანონგარეშედ გამოცხადებისა და მათი ლიდერების დაპატიმრების შესახებ არადემოკრატიულს უწოდებენ.

სენატორები ხაზგასმით აღნიშნავენ, რომ "ქართული ოცნება ძირს უთხრის საქართველოს დემოკრატიას".

"ჩვენ სულ უფრო მეტად შეშფოთებულები ვართ საქართველოში პოლიტიკური სიტუაციის გაუარესებით და საქართველოს მთავრობის მიერ ბოლო ადგილობრივი არჩევნების შემდეგ განხორციელებული შემაშფოთებელი ქმედებებით. პრემიერმინისტრ კობახიძის გადაწყვეტილება ოპოზიციური პარტიების კანონგარეშედ გამოცხადებისა და მათი ლიდერების დაპატიმრების შესახებ არის აღმაშფოთებელი, არადემოკრატიული და კიდევ ერთი მანიშნებელი იმისა, რომ ქართული ოცნება სრულიად არ არის დაინტერესებული პოლიტიკური დიალოგის ნორმალიზებით. პოლიტიკურად მოტივირებული გამოძიებები და სამოქალაქო საზოგადოების ლიდერების დაშინება, განსაკუთრებით მათი, ვინც აშშ-ს მთავრობასთან ერთად მუშაობდა და წარსულში ჩვენი კომიტეტის წინაშე მისცა ჩვენებაც, განსხვავებული აზრის გაჩუმების მცდელობას წარმოადგენს იმ ქვეყანაში, რომელსაც ძალის წინაშე სიმართლის თქმის საამაყო ისტორია აქვს.

ასევე მიუღებელია, რომ საქართველოს მთავრობამ მიზანში ამოიღო აშშ-ის მთავრობის ყოფილი თანამშრომლები უსაფუძვლო ბრალდებებით, რომ ისინი ძირს უთხრიან საქართველოს მთავრობას.

"მოდით, ნათლად ვთქვათ: სწორედ ქართული ოცნება უთხრის ძირს საქართველოს დემოკრატიას და მათ შესაძლებლობას, განსაზღვრონ საკუთარი მომავალი. ჩვენ მივესალმებით სახელმწიფო დეპარტამენტის გადაწყვეტილებას საქართველოს ელჩის დაბარების შესახებ, რათა განეხილათ მოვლენების შემაშფოთებელი განვითარება და მოვუწოდებთ ტრამპის ადმინისტრაციას, მხედველობაში ჰქონდეს საქართველოს მთავრობის ბოლოდროინდელი ქმედებები ორმხრივ ურთიერთობებში რაიმე ცვლილების განხორციელებამდე. ჩვენ ვუცხადებთ ჩვენს ურყევ, ორპარტიულ მხარდაჭერას იმ ქართველ ხალხს, რომელსაც უბრალოდ სურს მოითხოვონ თვითგამორკვევის უფლება", — ნათქვამია სენატორების მიერ გავრცელებულ წერილში