30 სექტემბერს, ფინანსთა სამინისტროს საგამოძიებო სამსახურმა გაავრცელა ინფორმაცია, რომ დააკავეს 2 პირი, რომლებმაც 2023 წელს შპს "ლაგი კაპიტალის" მეშვეობით გაიმარჯვეს მუნიციპალური განვითარების ფონდის მიერ საბავშვო ბაღების რეკონსტრუქცია-რეაბილიტაციისთვის გამოცხადებულ 11 ტენდერში, რაც 30 საბავშვო ბაღის რეაბილიტაციას ითვალისწინებდა და 2023 წლიდან არც ერთის რეაბილიტაცია არ დასრულებულა. ამას გარდა, ბრალდებულებმა ხელშეკრულება დაარღვიეს და გორის მუნიციპალიტეტში 3 სკოლიდან არც ერთი ააშენეს.

"ნოდარ მელაძის შაბათის" ინფორმაციით, 2015 წელს კომპანია "ლაგი კაპიტალის" 50%-იანი წილის მფლობელი ქართული ოცნების დეპუტატის, ირაკლი ზარქუას და — ნინი ზარქუა იყო. 2022 წელს აღნიშნული წილის მფლობელი ზარქუას მეუღლე, ალექსანდრე ამისულაშვილი გახდა.

დღეს, ნინი ზარქუა საბავშვო ბაღების ტენდერებთან დაკავშირებით მედიაში გავრცელებულ ინფორმაციას სოციალურ ქსელში გამოეხმაურა. ზარქუას განცხადებით, მისმა მეუღლემ ალექსანდრე ამისულაშვილმა წლების წინ გაასხვისა აღნიშნული კომპანია და მის ოჯახის წევრებს არანაირი კავშირი არ აქვთ მომხდართან. მისივე თქმით, სკეპტიკურად განწყობილ ხალხს "შეუძლიათ დაკავებულების ჩვენებებიც ნახონ".

"მინდა გამოვეხმაურო ნაცჟურნალისტების მიერ შეთხზულ სიცრუეს. გასაგებია არჩევნებია და ისევ გინდათ ჩემი ძმის მიმართ შავი პიარის აგორება და ამიტომაც ჩემს მეუღლეს და ზოგადად ჩვენს ოჯახს იყენებთ! თუმცა არ მინდა თქვენი მაყურებელი შევიდეს შეცდომაში და ამიტომაც ვხსნი...

ჩემს მეუღლეს და მით უმეტეს, ირაკლი ზარქუას არანაირი კავშირი არ აქვს ამ ტენდერებთან! ეს კომპანია "ლაგი კაპიტალი"არის გასხვისებული( გაყიდული) 2 ან 3 წლის წინ ზუსტად არც მახსოვს, შემდგომ, ახალმა მფლობელებმა რაც ჩაიდინეს არანაირ კავშირში არაა ალექსანდრე ამისულაშვილთან! მეტსაც გეტყვით საერთოდ სახეზეც კი არ იცის ეს პიროვნებები!გამოძიება დაადგენს ყველას დანაშაულს და შესაბამისი პასუხიც გაეცემათ იმისთვის რაც ჩაიდინეს, თუმცა ვაი ჟურნალისტებს მოუწევთ ბოდიშის მოხდა ჩემი ოჯახისთვის, რომლებიც სიცრუეს ავრცელებენ და მაყურებელი შეჰყავთ შეცდომაში!

P.S ხოლო სკეპტიკოსებს შეგიძლიათ ჩვენებებიც ნახოთ დაკავებულების და კიდევ უფრო მიხვდებით,რომ ჩემი ოჯახი ამ თემასთან საერთოდ არ არის კავშირში!", — წერს ნინო ზარქუა.

საბავშვო ბაღების ტენდერების საქმესთან ირაკლი ზარქუასა და მისი სიძის კავშირებზე დღეს ჟურნალისტებმა კახა კალაძეს დაუსვეს კითხვა. თბილისის მერმა უარყო ოცნების დეპუტატისა და მისი სიძის კავშირი კორუფციასთან და აღნიშნა, რომ "კომპანია წლების წინ იყო გასხვისებული".

"არანაირი კავშირი არ აქვს ზარქუას სიძეს ამ კომპანიასთან. წლების წლინ ეს კომპანია გასხვისებული იყო და კერძო საკუთრებაში არის. აღნიშნული კომპანია სხვა პიროვნების არის, წლების წინ იყო გასხვისებული," — თქვა კალაძემ.

პარტია ახალის წევრი ბესო დონაძე აქვეყნებს დოკუმენტს, რომლის თანახმადაც, 2023 წელს ალექსანდრე ამისულაშვილმა კომპანიაში თავისი წილი კი არ გაყიდა და გაასხვისა, არამედ ია რამიშვილს უსასყიდლოდ გადასცა.

დოკუმენტის თანახმად, 2023 წელს კომპანიის 50%-იანი წილის მფლობელმა ალექსანდრე ამისულაშვილმა და 25-25%-იანი წილების მფლობელებმა — ლაშა გრიგალავამ და გიორგი ლომიტაშვილმა "სრულიად უსასყიდლოდ, საკუთრების უფლებით" გადასცეს კომპანია ია რამიშვილს, რამაც ის კომპანიის 100% მფლობელი და დირექტორი გახადა.

ფოტო: ბესო დონაძე/FB

"ქალბატონო ნინი, ნუ გვატყუებთ, კომპანია არ გაგიყიდიათ, აჩუქეთ ია რამიშვილს. როგორ იპოვეთ ია რამიშვილი? საჯაროდ გამოაცხადეთ გავაჩუქებთ კომპანიასო? მტკიცებულება თან ერთვის.

პ.ს. "სახეზეც არ იცის" დოკუმენტებში არ არის მინდობილობები რაც იმას ნიშნავს რომ გადაფორმების დროს ყველა ადგილზე იყო," — წერს დონაძე.

შეგახსენებთ, ფინანსთა სამინისტროს საგამოძიებო სამსახურის ინფორმაციით, დაკავებული პირები თაღლითურად დაეუფლნენ 9 365 801 ლარს. გამოძიება სისხლის სამართლის კოდექსის 180-ე მუხლის მე-2 და მე-3 ნაწილებითა და 194-ე მუხლის მე-2 და მე-3 ნაწილებით მიმდინარეობს, რაც 9-დან 12 წლამდე პატიმრობას ითვალისწინებს.