პოლონეთმა ბელარუსთან საზღვრის გადაკვეთა ორ გამშვებ პუნქტზე განაახლა, თუმცა საკუთარ მოქალაქეებს, მათი უსაფრთხოების რისკების გამო, ქვეყნის დაუყოვნებლივ დატოვებისკენ მოუწოდა. ამის შესახებ მინსკში მდებარე პოლონეთის საელჩოს განცხადებაში აღნიშნული, რომელსაც European Pravda ავრცელებს.

საელჩოს ცნობით, შინაგან საქმეთა მინისტრის ბრძანების საფუძველზე, 25 სექტემბრიდან პოლონეთსა და ბელარუსს შორის საზღვარი გაიხსნა.

ამ დროისთვის, სამგზავრო მიმოსვლისთვის მხოლოდ ტერესპოლი–ბრესტის სასაზღვრო პუნქტი მუშაობს. გარდა ამისა, კოროშჩინი–კოზლოვიჩის სასაზღვრო პუნქტი სატვირთო გადაზიდვებისთვისაა ღია.

საელჩოს განცხადებაში წერია, რომ მზარდი დაძაბულობის, რეგიონში მიმდინარე სამხედრო მოვლენებისა და პოლონელი მოქალაქეების თვითნებური დაკავებების გამო, საგარეო საქმეთა სამინისტრო ბელარუსში გამგზავრების რეკომენდაციას არავის უწევს.

"უსაფრთხოების სიტუაციის მკვეთრი გაუარესების, საზღვრის ჩაკეტვის ან სხვა გაუთვალისწინებელი გარემოების შემთხვევაში, ევაკუაცია შესაძლოა მნიშვნელოვნად გართულდეს ან საერთოდ შეუძლებელი გახდეს. საგარეო საქმეთა სამინისტრო მოუწოდებს ბელარუსის რესპუბლიკაში მყოფ პოლონეთის მოქალაქეებს, დაუყოვნებლივ დატოვონ ქვეყანა არსებული კომერციული თუ კერძო საშუალებების გამოყენებით," — ნათქვამია განცხადებაში.

პოლონეთის პრემიერმინისტრმა დონალდ ტუსკმა ბელარუსთან საზღვრის გახსნის შესახებ განცხადება სამშაბათს, 23 სექტემბერს გააკეთა.

შეგახსენებთ, რომ 12 სექტემბრიდან პოლონეთსა და ბელარუსს შორის ყველა გამშვები პუნქტი დახურული იყო. გადაადგილების შეზღუდვა ორივე მიმართულებას ეხებოდა — პოლონეთიდან ბელარუსში და პირიქით, რაც რუსულ-ბელარუსული სამხედრო სწავლების "ზაპად-2025"-ის გამო მოხდა.