სასტუმრო "ჰოლიდეი ინნ-ში" შეიარაღებული პირი დააკავეს", — ამის შესახებ თბილისის პოლიციის დეპარტამენტის უფროსმა, ვაჟა სირაძემ ჟურნალისტებს განუცხადა. ტელეკომპანია "ფორმულას" ეთერში ვნახეთ როგორ გამოიყვანეს სასტუმროდან წელს ზევით ნახევრად შიშველი ახალგაზრდა კაცი და ჩასვეს პოლიციის მანქანაში.

ვაჟა სირაძის თქმით, შეტყობინება სასტუმროს ერთ-ერთი ნომრიდან გასროლასთან დაკავშირებით შევიდა და გამოძიება მუქარისა და ცეცხლსასროლი იარაღის უკანონო შეძენა-შენახვა-ტარების მუხლებით აღიძრა.

"შემოსული იყო შეტყობინება სასტუმროს ერთ-ერთი ნომრიდან გასროლასთან დაკავშირებით, აღნიშნულზე შინაგან საქმეთა სამინისტროს თანამშრომლებმა მოახდინეს სწრაფი რეაგირება. გამოვცხადდით ადგილზე და შესაბამისად მოხდა ნომერში ღონისძიების ჩატარება და აღნიშნული პირი დაკავებულია.

შეტყობინებაში როგორც აღნიშნული იყო და როგორც სასტუმროს პერსონალმა განაცხადა გაიგეს სავარაუდოდ გასროლის ხმა ამ ეტაპზე მიმდინარეობს კონკრეტულად ნომერში შემთხვევის ადგილის დათვალიერება და ამ ინფორმაციას ვაზუსტებთ. დავაკავეთ ერთი პიროვნება, გამოძიება დაწყებულია სისხლის სამართლის კოდექსის 236-ე და 151-ე მუხლებით რაც გულისხმობს მუქარასა და ცეცხლსასროლი იარაღის უკანონო შეძენა-შენახვა-ტარებას. ამ ეტაპზე შემთხვევის ადგილის დათვალიერება არ არის დასრულებული და დაზუსტებით ვერ გეტყვი ცეცხლსასროლი იარაღი არის თუ არა ამოღებული. მიმდინარე პროცესია, დასრულდება შემთხვევის ადგილის დათვალიერება და გამოძიების პროცესში დაზუსტებულად გეტყვით. [თავდამსხმელი] მარტო იმყოფებოდა", — განაცხადა ვაჟა სირაძემ.