ამერიკის შეერთებული შტატების საერთაშორისო განვითარების საფინანსო კორპორაციას (DFC) აშშ-უკრაინის რეკონსტრუქციის საინვესტიციო ფონდში 75 მილიონი დოლარი შეაქვს. ინფორმაციას უკრაინის ეკონომიკის სამინისტრო ადასტურებს და აღნიშნავს, რომ უკრაინა თანხის 150 მილიონ დოლარამდე გაზრდას გეგმავს.

უწყების განცხადებით, ფონდი მიზნად ისახავს ინვესტიციების განხორციელებას უკრაინაში, ისეთ სფეროებში, როგორიცაა კრიტიკული მინერალები, ენერგია, ნახშირწყალბადები, ტექნოლოგიები და ინფრასტრუქტურა.

უკრაინის ეკონომიკის სამინისტრო აცხადებს, რომ საწყისი კაპიტალი ინვესტიციის პროცესს დააჩქარებს და მომავალში ფონდის რესურსები შეივსება უკრაინაში ახალი მინერალების მოპოვებიდან მიღებული ჰონორარებით და წარმატებული ინვესტიციებიდან მიღებული მოგებით.

"უკრაინა შეერთებული შტატების წვლილს გაორმაგებს და ხაზს უსვამს ჩვენს ერთობლივ ვალდებულებას, რომ ერთად ინვესტირება მოვახდინოთ რეკონსტრუქციის საინვესტიციო ფონდის მეშვეობით. ფონდი დააფინანსებს პროექტებს, რომლებიც მიზნად ისახავს კრიტიკული ინფრასტრუქტურის აღდგენას, ახალი ტექნოლოგიების მასშტაბირებას და ჩვენი ბუნებრივი რესურსების პასუხისმგებლობით განვითარებას. ეს ინვესტიციები შექმნის სამუშაო ადგილებს ორივე ქვეყანაში და საშუალებას მისცემს ამერიკულ და უკრაინულ კომპანიებს ერთად იმუშაონ. ჩვენი პარტნიორობა შეამცირებს გლობალური მიწოდების ჯაჭვის რისკებს და მობილიზებას გაუკეთებს კერძო კაპიტალს უკრაინის რეკონსტრუქციისა და უსაფრთხოების გასაძლიერებლად," — განაცხადა უკრაინის ეკონომიკის, გარემოს დაცვისა და სოფლის მეურნეობის მინისტრმა, ალექსეი სობოლევმა.

მისივე თქმით, აღდგენის დაფინანსების გარდა, საქმე ეხება შეერთებულ შტატებთან პარტნიორობით უკრაინისთვის ახალი ეკონომიკური არქიტექტურის ჩამოყალიბებასაც. მინისტრის განცხადებით, საწყისი შენატანი უფრო ფართო კერძო ინვესტიციების მოზიდვის კატალიზატორის როლს შეასრულებს.

ცნობისთვის, 3 სექტემბერს ფონდის მენეჯერთა საბჭოს პირველი შეხვედრა გაიმართა, რომელშიც აშშ-ის ფინანსთა მდივანი სკოტ ბესენტი და უკრაინის პრემიერმინისტრი იულია სვირიდენკო მონაწილეობდნენ. ასევე დამტკიცდა საინვესტიციო, აუდიტის, ადმინისტრაციული და საძიებო კომიტეტების წესდება, რომელიც პროექტების შერჩევისა და ინვესტიციების გამჭვირვალე პროცედურებს უზრუნველყოფს.

რეკონსტრუქციის საინვესტიციო ფონდი უკრაინისა და შეერთებული შტატების მთავრობებს შორის გრძელვადიან პარტნიორობას ეფუძნება. მისი მიზანია კერძო კაპიტალის, მრავალმხრივი განვითარების ბანკების და სტრატეგიული ინვესტორების მოზიდვა.

პრიორიტეტულ სფეროებად კრიტიკული მინერალების, ენერგეტიკის, ინფრასტრუქტურის და ახალი ტექნოლოგიების განვითარება განისაზღვრა.