11 სექტემბერს დაკავებული ენმ-ს ლიდერი სუს-ის წინასწარი მოთავსების იზოლატორიდან წერილს აგზავნის. ის წერს, რომ "4 ოქტომბერი არის გამარჯვების დღე და ეს ყველას ერთად შეგვიძლია".

"ივანიშვილმა აღიარა მარცხი! "პიჟონმა" მამუკა მდინარაძემ და სვეტლანა კობახიძემ აღასრულეს ჟანდარმერიის ხელით. 4 ოქტომბერი არის გამარჯვების დღე და ეს ყველას ერთად შეგვიძლია. ვამბობდი და ვამბობ, საჭიროა გამარჯვების რწმენა, გატეხეთ შიში, აჯობეთ საკუთარ თავს. ბიძინამ და ამ რეჟიმმა გამოაცხადა სრული კაპიტულაცია . არ მჯერა, რომ მშიშარა ერი ვართ. არ მჯერა, რომ მიუხვედრელი ხალხი ვართ. პირიქით. მჯერა, დარწმუნდით ამ გზის სისწორეში და რეჟიმის მარცხში. არანაირი გრძელვადიანი. 4-ში ვიწყებთ და 4-ში ვამთავრებთ. ვინც კიდევ შემოგთავაზებთ, ბლა-ბლა-ბლას, იცოდეთ არის ივანიშვილის უნებლიე ან ნებით მოკავშირე. აიღე საქართველოს დროშა და გაიმარჯვე 4-ში", — წერს ხაბეიშვილი.

ენმ-ს ლიდერი ლევან ხაბეიშვილი საჯარო მოხელისთვის ქრთამის შეთავაზების ბრალდებით დააკავა. სუს-ი ხაბეიშვილს ერთ-ერთი ტელეკომპანიის ეთერში გაკეთებული განცხადების გამო ედავება, სადაც ოპოზიციური ლიდერი სამართალდამცავებს მმართველი პარტიის მითითებების არ შესრულებისკენ მოუწოდებს და სანაცვლოდ 200 000 დოლარს ჰპირდება.

გუშინ, 11 სექტემბერს ლევან ხაბეიშვილთან ერთად დააკავეს კოალიცია ცვლილებისთვის წევრი მურთაზ ზოდელავა. მოგვიანებით სუს-მა გაავრცელა ინფორმაცია, რომ ასევე დაკავებულია თავდაცვის ყოფილი მინისტრი ჯუანშერ ბურჭულაძეც.