საქართველოს ნაკრებმა ევრობასკეტზე მორიგი სენსაცია მოახდინა. მაშინ, როდესაც საკალათბურთო სამყარო საფრანგეთი vs სერბეთის მეოთხედფინალურ დაპირისპირებაზე წინასწარ საუბრობდა, საქართველომ და ფინეთმა გულშემატკივრებს დიდი სიურპრიზი მოუწყვეს და მოულოდნელობის ეფექტის გამო, მიმდინარე ტურნირი უფრო საინტერესო გახდა.

ამ გამარჯვებამ, შესანიშნავი მაგალითით კიდევ ერთხელ დაადასტურა: არასდროს უნდა იფიქრო, რომ რაიმე არ გამოვა. სათქმელად იოლია, საქმედ კი რთული. მაგრამ იმის რწმენა, რომ შეუძლებელი არაფერია უკვე გამარჯვების ინსპირაციის წყარო ხდება.

ჟინი, რომელიც სხეულში ჩქეფს, მამოძრავებელია: მას მოაქვს თავდაჯერება, გაბედულება, მოქმედების თავისუფლება. მის გარეშე, წინსვლა შეუძლებელია,მოუსვენარ ჟინს, ყოველთვის გამარჯვებასთან მიჰყავხარ.

სპორტს აქვს უნარი, მკაფიოდ და ხმაურიანად დაადასტუროს მთელი ამ თეორიების სინამდვილე. როდესაც წარმოადგენ პატარა ქვეყანას, რომელიც ოლიმპიადის ვიცეჩემპიონს ეთამაშება, ან იჯერებ გამარჯვებას, ან დასაწყისშივე ნებდები. თუმცა, რატომ უნდა დანებდე? ჟინი თავისას არ იშლის, მობილიზდები და საკუთარ ძალებს 100%-ით იაქტიურებ.

ასეც მოხდა: საკუთარი ძალების ვირწმუნეთ და ჯერ ევროპის მოქმედი ჩემპიონი ესპანეთი, შემდეგ კი 2024 წლის პარიზის ოლიმპიადის ვიცე-ჩემპიონი საფრანგეთი დავამარცხეთ. გუნდი, რომელმაც პარიზის ოლიმპიადის ფინალი კევინ დურანტით, ლებრონ ჯეიმსით, სტეფ კარით და სხვა ვარსკვლავებით დაკომპლექტებულ აშშ-ს ნაკრებთან წააგო.

არადა, საფრანგეთთან მატჩის დაწყებამდე, მეოთხედფინალში გასვლის სულ რაღაც 5%-იანი შანსი გვქონდა, ჩვენ კი 100%-ით, დამსახურებულად გავიმარჯვეთ. უდავო ფაქტია, რომ ბოლო წლების განმავლობაში, ეს იყო საუკეთესო მატჩი, რომელიც საქართველოს ნაკრებმაითამაშა.

საფრანგეთთან მატჩის მიმოხილვა

მთელი შეხვედრის განმავლობაში, საფრანგეთის გუნდი მდევრის როლში იმყოფებოდა. სტარტშივე, ჩვენს ნაკრებს ლიდერობდნენ თორნიკე შენგელია და კამარ ბოლდუინი და მათი ზუსტი სროლების დამსახურებით, უპირატესობა მოვიპოვეთ (ბოლდუინი 2025 წლის ევრობასკეტის 1/8 ეტაპის საუკეთესო ხუთეულში მოხვდა). პირველი ტაიმის განმავლობაში, მეტოქე წინ მხოლოდ სტარტზე და შემდეგ, მე-2 მეოთხედში, ისიც დროებით, 2 ქულით დაწინაურდა. საერთო ჯამში, პირველი ტაიმი ანგარიშით 37:38 დასრულდა.

წინ მე-3 მეოთხედი გველოდებოდა, რომელიც ჩვენთვის ყოველთვის რთული იყო. ფრანგების დამაჯერებელმა, 4-ბურთიანმა დაწინაურებამ ქართველი ქომაგი ცოტათი დაძაბა, თუმცა შემდეგ, 4-5 წუთის განმავლობაში, მეტოქემ ქულა საერთოდ ვეღარ აიღო. ყველანი მივხვდით, ვარსკვლავური საფრანგეთის გაჩერება რომ შეგვეძლო.

გადამწყვეტი ფაზა მეოთხე მეოთხედში დადგა: 9 ქულით დავწინაურდით, თუმცა ფრანგებმა სხვაობა 2 ქულამდე დაიყვანეს. სწორედ ამ დროს, კაპიტანმა თავისი სიტყვა თქვა: მაშინ, როდესაც შეტევისთვის 2 წამზე ნაკლები გვქონდა დარჩენილი, შენგელიამ უმნიშვნელოვანესი სამქულიანი ჩააგდო და დვწინაურდით (61:66). ფრანგებმა სტატუს-კვოს აღდგენა (68:68) მალევე მოახერხეს, თუმცა მატჩის დასრულებამდე 3 წუთით ადრე, შენგელიამ მორიგი ზუსტი სამიანი ისროლა. ეს იყო ორი ზუსტი სამიანი, რომელმაც მატჩის საბოლოო შედეგი გადაწყვიტა. ფრანგები დაიბნენ, გატყდნენ, შეცდომებს უმატეს, ჩვენ კი ქულას ქულაზე ვამატებდით და საბოლოოდ, დამაჯერებელი ანგარიშით, 70:80 გავიმარჯვეთ.

პარალელურ რეჟიმში, თბილისში, ბორის პაიჭაძის სახელობის ეროვნულ სტადიონზე, საქართველოს საფეხბურთო ნაკრები ბულგარეთს ამარცხებდა, ქომაგების ყურადღება კი ორად იყო გაყოფილი: ცალკე მოედანს, ცალკე კი რიგაში მიმდინარე შეხვედრის ანგარიშს აკონტროლებდნენ. უეცრად, მოედანზე შეკრებილმა პუბლიკამ სიხარულის ყიჟინა დასცა, თამაშის დასრულების შემდეგ, ხვიჩა კვარაცხელიამაც აღნიშნა: "ხიზანას ჩავუარე, მართლა მოვიგეთ-მეთქი? არ მჯეროდა, ბედნიერი ვარ, დღეს საქართველოს დღეა".

საქართველო ევრობასკეტის საუკეთესო 8 გუნდს შორისაა!

ემოციების, სიხარულისა და ეროვნული სიამაყის კორიანტელში, მორიგი მატჩისთვის მოვემზადეთ: როგორც მოგახსენეთ, ¼-ფინალში ფინეთს დავუპირისპირდებით. მატჩი 10 სექტემბერს, 18:00-ზე გაიმართება. ამბობენ, ფავორიტი ფინეთიაო, მაგრამ საქართველომ უკვე არაერთხელ თქვა თავისი სათქმელი და დაამტკიცა, რომ ნებისმიერი გუმდის დამარცხება შეუძლია. მით უმეტეს, ფინეთი ნამდვილად არ გახლავთ არც ესპანეთის და არც საფრანგეთის დონის ნაკრები და, შესაბამისად, ევრობასკეტის ნახევარფინალში თამაში აბსოლუტურად რეალისტურად (და არა ოპტიმისტურად) გვესახება.

ევრობასკეტის ნახევარფინალისკენ ვისწრაფით: რაღაც განსაკუთრებულის, თითქოს დაუჯერებლის მომსწრენი ვართ. ჟინი ხომ არ ცნობს უკან დახევას? და ჩვენც რატომ უნდა გავჩერდეთ

არ გაჩერდე, საქართველო.

დიდი გამარჯვება წინ გელოდება.

ერთად ვუგულშემატკივროთ ქართველ სპორტსმენებს. საქართველოს ბანკი საქართველოს ეროვნული საკალათბურთო ნაკრების მთავარი სპონსორია.