2 სექტემბერს, რუსთაველის გამზირზე ადმინისტრაციული წესით დაკავებული ლუკა დევდარიანი სასამართლომ სამართალდამრღვევად ცნო და 500 ლარით დააჯარიმა.

დევდარიანის თქმით, შსს მის მიმართ 60-დღიან ადმინისტრაციულ პატიმრობას ითხოვდა. მან პოლიციის მხრიდან ძალადობაზეც ისაუბრა.

"ძალით მომიჭირეს და ჩამტენეს მანქანაში და იქ მივიღე დაზიანება. ცივი ბოთლით — გაყინული ბოთლით — ბეჭებში მირტყეს. ერთი-ორმა თავში ჩამარტყა. მერე ჩქმეტა დამიწყეს და რომ მტკიოდა, მეც გავკარი ხელი. მანქანაში ფარდები გადმოწიეს, რომ ხალხს არ დაენახა და მერე მიმიყვანეს განყოფილებაში. "პადვალში" ჩაგიყვანთო და იქ მაგრად გცემთო," — თქვა დევდარიანმა "ტვ პირველის" ეთერში.

ცნობისთვის, ცნობისთვის, 2 სექტემბერს, რუსთაველის გამზირზე ადმინისტრაციულ სამართალდარღვევათა კოდექსის 166-ე და 173-ე მუხლებით, რაც პოლიციისთვის წინააღმდეგობის გაწევასა და წვრილმან ხულიგნობას გულისხმობს, 23 პირი დააკავეს.

პარლამენტთან შეკრებილები 2008 წლის აგვისტოს ომთან დაკავშირებულ საკითხზე დროებითი საგამოძიებო კომისიის დასკვნას აპროტესტებდნენ. ისინი სკანდირებდნენ: "წულუკიანი მონა", "კობახიძე მონა", "თავისუფლება რეჟიმის ტყვეებს".