ოცნების პრემიერმა, ირაკლი კობახიძემ განაცხადა, რომ გაეროს გენერალური ასამბლეის 80-ე სესიას, რომელიც სამშაბათს, 9 სექტემბერს გაიხსნება "უმჯობესია, საქართველოს პრეზიდენტი ეწვიოს".

მისივე თქმით, არ არის ინგლისურის ცოდნა აუცილებელი, ყაველაშვილს "თავისუფლად შეიძლება თარჯიმნის მეშვეობით კომუნიკაცია".

"ჩვენ შევთანხმდებით, გვექნება კონსულტაციები ამასთან დაკავშირებით. ვფიქრობ, უმჯობესია, საქართველოს პრეზიდენტი ეწვიოს გაეროს, მათ შორის ტექნიკური მიზეზიც აქვს ამ ყველაფერს, არის საარჩევნო რეჟიმი და მე, როგორც შტაბის ხელმძღვანელი, უშუალოდ ვარ ჩართული საარჩევნო პროცესებში, შესაბამისად, ფიზიკურადაც რთულია ჩემთვის გაეროში სტუმრობა. აქედან გამომდინარე, სხვადასხვა მიზეზის გამო, ვფიქრობ, უმჯობესი იქნება, წელს გაეროს ესტუმროს მიხეილ ყაველაშვილი. საქართველოს პრეზიდენტის ჩასვლა ნიუ იორკში არის აბსოლუტურად სწორი.

[...] ერთხელ ვიყავი გაეროში, შარშან თებერვლიდან ვიკავებ პრემიერის თანამდებობას, ამის შემდეგ იყო ერთი სამიტი, მივიღე მონაწილეობა, ახლა არის მეორე სამიტი და აბსოლუტურად ლოგიკურია, რომ პრეზიდენტმა მიიღოს მონაწილეობა... არ არის [ინგლისური] აუცილებელი, თავისუფლად შეიძლება თარჯიმნის მეშვეობით კომუნიკაცია გაეროში, რაც არის აბსოლუტურად მიღებული პრაქტიკა. ქართულ ენაზე, მშობლიურ ენაზე შეუძლია მიხეილ ყაველაშვილს მიმართოს დამსწრე საზოგადოებას", — განაცხადა ირაკლი კობახიძემ.